მადრიდის რეალმა მარცხენა მცველი ფრან გარსია იჯარით ბორნმუთში არ გაუშვა.
The Athletic-ის ინფორმაციით, ესპანელი ფეხბურთელი ინგლისური კლუბის ვარიანტს სათამაშო დროის მისაღებად შესანიშნავ შესაძლებლობად მიიჩნევდა. ვარჯიშების დროს ის თანაგუნდელებს ხშირად ეუბნებოდა, რომ ბორნმუთში გადასვლის საკმაოდ დიდი შანსი ჰქონდა, თუმცა პარასკევს კლუბმა საბოლოოდ გადაწყვიტა, ფეხბურთელი არ გაეშვა.
ტრანსფერზე უარის მიღების შემდეგ, 26 წლის ესპანელმა შაბათს ინდივიდუალურად ვარჯიში მოითხოვა. კლუბმა მისი თხოვნა ნაწილობრივ დააკმაყოფილა — გარსიამ პირველი 15 წუთი, რომელიც მედიასთვის იყო გახსნილი, გუნდთან ერთად გაატარა, შემდეგ კი განცალკევებით განაგრძო მომზადება.
ბორნმუთი მზად იყო, ფეხბურთელი სეზონის ბოლომდე იჯარით დაემატებინა, თავად გარსიაც ამ ვარიანტს დიდი ენთუზიაზმით უყურებდა, თუმცა რეალის ხელმძღვანელობამ თავიდანვე გადაწყვიტა, რომ იანვარში გუნდს ენდრიკის გარდა არავინ დატოვებს და ამიტომ, თავდაპირველი პოზიციის შეცვლა აღარ მოისურვა.
ფრან გარსიას კონტრაქტი 2027 წლამდეა ძალაში და ზაფხულში ის შეეცდება ისეთი კლუბი იპოვოს, სადაც გაცილებით მეტ სათამაშო დროს მიიღებს. ამ ეტაპზე ის მშობლიურ რეალში მეორე მარცხენა მცველიც არ არის — ალვარო კარერასის არყოფნის შემთხვევაში, ალვარო არბელოა ამ ფლანგზე ნახევარმცველ ედუარდო კამავინგას აყენებს ხოლმე.
