რატომ ვერ გაამართლა რაჰიმ სტერლინგმა იმედები ნიდერლანდებში?

რაჰიმ სტერლინგი სეზონის ბოლოს ფეინოორდს დატოვებს.

მანჩესტერ სიტისა და ჩელსის ყოფილი ვარსკვლავის როტერდამული კარიერა ხანმოკლე და წარუმატებელი აღმოჩნდა, კლუბმა გადაწყვიტა, ინგლისელს კონტრაქტი აღარ გაუგრძელოს.

მოლოდინები და რეალობა

31 წლის ვინგერი ნიდერლანდებში დიდი ზარ-ზეიმით თებერვალში ჩავიდა, თუმცა მასზე დამყარებული იმედები ვერ გაამართლა. სტერლინგმა ერედივიზიონში მხოლოდ 333 წუთი ითამაშა. Algemeen Dagblad-ის ინფორმაციით, მიუხედავად იმისა, რომ რაჰიმი ვარჯიშებზე პროფესიონალიზმს ინარჩუნებს, მისი დაბალი პროდუქტიულობის გამო კლუბმა მასთან თანამშრომლობის გაგრძელებაზე საბოლოოდ უარი თქვა.

ვან პერსიმ პოზიცია შეცვალა

თავდაპირველად გუნდის მთავარი მწვრთნელი, რობინ ვან პერსი, სტერლინგის დარჩენის შესაძლებლობას განიხილავდა, თუმცა კლუბის ხელმძღვანელობამ ეს ვარიანტი დღის წესრიგიდან მოხსნა. ფეხბურთელმა სათანადო ხარისხი ვერც ექსელსიორთან გამართულ ამხანაგურ მატჩში აჩვენა.

გავრცელებული ცნობით, სტერლინგი 17 მაისამდე, ანუ კონტრაქტის ამოწურვამდე, ბოლომდე დაიხარჯება, თუმცა მისი წასვლა უკვე გადაწყვეტილია. ის ფეინოორდის მაისურით მაქსიმუმ კიდევ ოთხჯერ წარდგება მაყურებლის წინაშე.

ბრძოლა ჩემპიონთა ლიგისთვის

ფეინოორდს სეზონის რთული ფინიში ელის - გრონინგენთან, ფორტუნასთან, აზ ალკმაართან და ზვოლესთან მატჩებში მათ სატურნირო ცხრილის მეორე პოზიცია უნდა შეინარჩუნონ. ეს ადგილი 2026-27 წლების ჩემპიონთა ლიგის საგზურს პირდაპირ იძლევა. ვან პერსის გუნდი მდევარ ნეკ-ს მხოლოდ ერთი, ხოლო ტვენტეს ორი ქულით უსწრებს. სტერლინგს კი ძალიან ცოტა დრო რჩება, რომ კლუბს დამშვიდობებამდე რაიმე სასარგებლო შესთავაზოს.