გარკვეულწილად, კრიშტიანუ რონალდუს გადასვლამ სერია ა-ში და იუვენტუსში თავისი როლი ითამაშა ბიანკონერის ბოლოდროინდელ სირთულეებში. ფაბიო პარატიჩი, რომელიც ამ ტრანსფერის ერთ-ერთი ავტორი იყო, როგორც ჩანს, არ ნანობს პორტუგალიელის ტურინში ჩაყვანას.
რონალდუ იმ დროს მიიწვიეს, როცა იუვენტუსი ჩემპიონთა ლიგის მოსაგებად გადამწყვეტი ნაბიჯის გადადგმას ცდილობდა. მანამდე, ხუთი წლის განმავლობაში, მათ ორჯერ მიაღწიეს ფინალს, თუმცა ამ ტრანსფერმა მოლოდინი ვერ გაამართლა და ბიანკონერი ფინანსურ სირთულეებში, სამართლებრივ პრობლემებსა და მოგვიანებით ქულების დაკლებამდეც კი მიიყვანა.
დღეს Corriere della Sera-სთან ინტერვიუში პარატიჩიმ თავის კარიერაზე, კონკრეტულ გადაწყვეტილებებსა და ტოტენჰემში გატარებულ პერიოდზე ისაუბრა. კითხვაზე, ნანობს თუ არა რონალდუს ტრანსფერს, მან უპასუხა:
ის ძვირფასი იყო იუვენტუსისთვის და მნიშვნელოვანი ყველასთვის, ზუსტად ისე, როგორც მოურინიო იყო რომაში. ჩემპიონატს სჭირდება დიდი მოთამაშეები. ჩვენ ყველას გვსურდა ჩემპიონთა ლიგა და შეგვეძლო მისი მოგება პირველივე წელს. აიაქსთან გამოვარდნა დღემდე გონებაში მიტრიალებს.
პრობლემა ის იყო, რომ თითო თამაშში ერთი გოლის გატანით კრიშტიანუმ ცხოვრება ზედმეტად გაუმარტივა თანაგუნდელებს, რომელთაც მანამდეც ბევრი ჰქონდათ მოგებული. სწორედ ამიტომ შევცვალეთ მწვრთნელები, რათა გუნდისთვის ერთგვარი ბიძგი მიგვეცა.
პარატიჩიმ ასევე აღნიშნა, რომ რონალდუსა და მაქს ალეგრის შორის პრობლემები არ ყოფილა, მიუხედავად იმ პერიოდის გავრცელებული ცნობებისა:
არა, ალეგრი ყველაზე ჭკვიანია; მისი უნარი, დაამყაროს კავშირი მოთამაშეებთან, ყველაფერს ცვლის. სარის დასაწყისში ჰქონდა სირთულეები, რადგან ტაქტიკურად უფრო ფუნდამენტალისტი იყო, მაგრამ შემდეგ ადაპტირდა. მან სკუდეტოც მოიგო - ბევრს ეს დაავიწყდა.
მიუხედავად იმისა, რომ ტრანსფერმა ბებერი ქალბატონისთვის საბოლოოდ უარყოფითი შედეგი გამოიღო, თავად რონალდუ არ ყოფილა პრობლემა. მთავარი დაბრკოლება კლუბის მართვა აღმოჩნდა, რადგან მათ კოვიდ პანდემიით გამოწვეული ფინანსური კრიზისის ფონზე პორტუგალიელის ხელფასის გადახდა ვეღარ შეძლეს.
