მადრიდის რეალის ვარსკვლავმა, ჯუდ ბელინგემმა აღიარა, რომ ბოლო შვიდი კვირის განმავლობაში მიღებულ ტრავმასთან გამკლავება ფიზიკურთან ერთად, ფსიქოლოგიურადაც ძალიან გაუჭირდა.
ინგლისის ნაკრების ფეხბურთელი მოედანზე უკვე დაბრუნდა და თავს გაცილებით უკეთ გრძნობს.
ბელინგემმა ატლეტიკო მადრიდთან მოგებულ დერბიში (3:2) 22 წუთი ითამაშა. ეს მისი პირველი გამოჩენა იყო პირველი თებერვლის შემდეგ, კუნთის გაწყვეტის გამო მან 10 მატჩი გამოტოვა. გამარჯვების შემდეგ ჯუდმა აღიარა, რომ რეაბილიტაციის პერიოდი მისთვის საკმაოდ მძიმე აღმოჩნდა.
"ძალიან დიდი დრო გავიდა, მთელი შვიდი კვირა. დიდხანს ვიყავი მოწყენილი და დათრგუნული, თუმცა ახლა ბედნიერი ვარ, რადგან გუნდთან ერთად ვარჯიშის საშუალება ისევ მომეცა," - განაცხადა ბელინგემმა RMTV-სთან საუბრისას.
ეს გამარჯვება ალვარო არბელოასთვის, რეალ მადრიდის მთავარი მწვრთნელის რანგში, ატლეტიკო მადრიდთან პირველი მოგება იყო. სამეფო კლუბმა კი გამარჯვებების სერია ხუთ მატჩამდე გაზარდა.
ჯუდმა თანაგუნდელებიც შეაქო და განსაკუთრებით ფედე ვალვერდე და ვინისიუს ჟუნიორი გამოყო. სწორედ მათმა გოლებმა გადაწყვიტა დერბის ბედი. ბელინგემის თქმით, რთულ მომენტებში ეს ორი ფეხბურთელი ყოველთვის ახერხებს თამაშის საკუთარ თავზე აღებას და გუნდის დახმარებას.
აღსანიშნავია, რომ წლის დასაწყისში ბელინგემს, ვალვერდესა და ვინისიუსს გულშემატკივრები სტვენით ხვდებოდნენ. ვრცელდებოდა ინფორმაცია, თითქოს ისინი უკმაყოფილოები იყვნენ ჩაბი ალონსოთი და მისი პოსტიდან გათავისუფლებაშიც მიიღეს მონაწილეობა, თუმცა თავად ფეხბურთელები ამ ჭორებს კატეგორიულად უარყოფენ.
