მადრიდის რეალი უკმაყოფილოა ინგლისის ნაკრების მთავარი მწვრთნელის, ტომას ტუხელის გადაწყვეტილებით.
კლუბში მიიჩნევენ, რომ ურუგვაისა და იაპონიის წინააღმდეგ გამართული ამხანაგური მატჩებისთვის ჯუდ ბელინგემის ნაკრებში გამოძახება სრულიად უაზრო ნაბიჯი იყო.
მიმდინარე სეზონში ბელინგემმა, ტრავმების გამო, ლა ლიგაში მხოლოდ 15 მატჩის ჩატარება შეძლო. 2025 წლის ბოლოს მას მხარზე ოპერაცია დასჭირდა, ახლახან კი კუნთის პრობლემას მკურნალობდა. მიუხედავად იმისა, რომ ჯუდი მოედანს სულ რამდენიმე კვირის წინ დაუბრუნდა, ტუხელმა ის მაინც გამოიძახა ნაკრებში.
ბელინგემი გუნდთან ერთად ვარჯიშობდა, თუმცა არცერთ მატჩში ერთი წუთიც კი არ უთამაშია. ტომას ტუხელმა თავისი გადაწყვეტილება BBC-სთან ასე განმარტა:
ჩავთვალეთ, რომ რისკი ძალიან დიდი იყო. მიუხედავად იმისა, რომ თამაშის ნაკლები შანსი ჰქონდა, მისი აქ ყოფნა მაინც მნიშვნელოვანი გახლდათ. ვარჯიშებს თავს კარგად ართმევდა, თუმცა ბოლომდე მაინც არ ვტვირთავდით.
ესპანური გამოცემა MARCA-ს ცნობით, მადრიდში ამ ყველაფერს სკეპტიკურად უყურებენ. მათი აზრით, ეს იყო „უაზრო მოგზაურობა“, რომელმაც „უფრო მეტი კითხვა გააჩინა, ვიდრე პასუხი“.
როგორც ჩანს, რეალს ერჩივნა ბელინგემს ან საერთოდ არ ემგზავრა ამხანაგური თამაშებისთვის და მშვიდად აღედგინა ძალები, ან თუ წავიდოდა, მცირე სათამაშო დრო მაინც მიეღო ფორმაში შესასვლელად. წინ რეალს ხომ შაბათს მალიორკასთან მატჩი, სამშაბათს კი ჩემპიონთა ლიგაზე მიუნხენის ბაიერნთან უმნიშვნელოვანესი დაპირისპირება ელოდება.
