რეალის ვარსკვლავის პირველი განცხადება მუნდიალის ფიასკოზე

2026 წლის მსოფლიო ჩემპიონატიდან საფრანგეთის ნაკრების გავარდნის შემდეგ, კილიან მბაპემ დუმილი დაარღვია.

მადრიდის რეალის სუპერვარსკვლავმა და მამლების კაპიტანმა სოციალურ ქსელებში ვრცელი, უკიდურესად ემოციური წერილი გამოაქვეყნა, სადაც ფრანგ გულშემატკივრებს მიმართა და მუნდიალის ფიასკო შეაფასა.

მიუხედავად იმისა, რომ 27 წლის თავდამსხმელი ტურნირის საუკეთესო ბომბარდირი გახდა, ის მთავარი მიზნის მიღწევის გარეშე დარჩა. ამჟამად შვებულებაში მყოფი მბაპე, რომელიც მალე მადრიდში, ჟოზე მოურინიოს ხელმძღვანელობით სავარჯიშო პროცესის განახლებას ელის, ტკივილსა და იმედგაცრუებას არ მალავს:

ჩვენ ვერ მოვიგეთ გუნდური ტიტული და ეს ძალიან მტკივნეულია. ეს ტკივილი კიდევ დიდხანს გაგრძელდება, არ მოგატყუებთ. ალბათ, უკეთეს დასასრულს იმსახურებდით, მაგრამ ჩვენ ყოველთვის არ ვირჩევთ, როგორ დასრულდება ისტორია; სამაგიეროდ, ვირჩევთ, რას ჩავდებთ მასში და ჩვენ ყველაფერი გავიღეთ

მბაპემ საუკეთესო ბომბარდირის ტიტული თანაგუნდელებს მიუძღვნა და აღნიშნა, რომ მათი თავდაუზოგავი შრომის, მოძრაობისა და გადაცემების გარეშე, ამ ჯილდოს ვერ მიიღებდა. მან განსაკუთრებული მადლობა გადაუხადა მთავარ მწვრთნელს, დიდიე დეშამს და მთელ პერსონალ, ფიზიოთერაპევტებიდან დაწყებული, მზარეულებითა და მძღოლებით დამთავრებული.

ფრანგების ვარსკვლავმა გულშემატკივრების ფაქტორსაც გაუსვა ხაზი:

მადლობა ყველას, ვინც ღამეებს ათენებდა და დროის სხვაობის მიუხედავად, მსოფლიოს მეორე ბოლოდან გვიყურებდა. თქვენ არასდროს მიგვიტოვებივართ, ყველაზე რთულ მომენტებშიც კი, მაშინაც კი, როცა ამას ყველაზე ნაკლებად ვიმსახურებდით. მე ვითამაშე სამ მსოფლიო ჩემპიონატზე, მოვიგე ერთი და წელს მქონდა პატივი, ვყოფილიყავი კაპიტანი. ამას არასდროს დავივიწყებ!

ბოლოს კი, რეალის შემტევმა გულშემატკივრებს იმედი ჩაუსახა და განაცხადა:

მსოფლიო ჩემპიონატი დასრულდა, მაგრამ ისტორია გრძელდება. ჩვენ ჯერ არ დაგვისრულებია ერთად თამაში!