როგორც ჩანს, უახლოეს პერიოდში რეალსა და პსჟ-ს შორის სატრანსფერო ბაზარზე არგენტინელი ტალანტისთვის სერიოზული ბრძოლა გაჩაღდება.
ფაბრიციო რომანოს ინფორმაციით, ბოლო საათებში რეალმა რივერ პლეიტს დაურეკა იმის გასარკვევად, დახურა თუ არა პსჟ-მ 17 წლის არგენტინელი შემტევის, ფრანკო მასტანტუონოს ტრანსფერი.
ამჟამად პარიზელები ფრანკოსთვის ბრძოლაში ლიდერობენ, თუმცა უნდა დავაკვირდეთ, როგორ იმოქმედებს რეალი. ამ დრომდე სამეფო კლუბი ფეხბურთელის ტრანსფერზე აქტიურად არ მუშაობდა, რადგან მის აგენტთან მოლაპარაკებებში გარკვეული პრობლემები შეექმნა. თუმცა, ახლა სიტუაცია შეეცვალა.
შეგახსენებთ, რომ რივერ პლეიტის კონტრაქტში მასტანტუონოს გამოსასყიდი თანხა აქვს ჩაწერილი 45 მილიონი ევროს ოდენობით და არგენტინული კლუბი სწორედ ამ თანხის გადახდას ითხოვს, სხვა შემთხვევაში მოლაპარაკებების გამართვაც არ სურს.
უახლოესი დღეები მასტანტუონოსთვის ბრძოლაში გადამწყვეტი იქნება და გამოჩნდება, რამდენად მიიყვანს პსჟ საქმეს ბოლომდე იმ ტრანსფერზე, რომელშიც ჯერჯერობით რეალზე წინ არის მოლაპარაკებებში წასული.
არგენტინულ პრესას თუ დავუჯერებთ, თავად 17 წლის შემტევის ოცნება მადრიდის რეალში გადასვლაა.
