რეფორმები არ იქნება - რეალის ოფიციალური განცხადება

მადრიდის რეალმა ოფიციალური განცხადება გამოაქვეყნა, რომელშიც კატეგორიულად უარყო გავრცელებული ინფორმაცია კლუბის ადმინისტრაციულ სისტემაში მოსალოდნელი რეფორმების შესახებ.

საუბარია სპორტული დირექტორის პოზიციის აღდგენაზე, რაც ბოლო წლებში სამეფო კლუბში გაუქმებული იყო.

საიდან დაიწყო ჭორები?

ცნობილმა ესპანურმა რადიოგადაცემა El Larguero-მ გაავრცელა ინფორმაცია, რომ ფლორენტინო პერესი სპორტული დირექტორის თანამდებობის დაბრუნებას გეგმავდა. ჟურნალისტ ანტონ მეანას თქმით, კლუბს უკვე დაწყებული ჰქონდა კანდიდატების შესწავლა, რათა ხოსე ანხელ სანჩესის, ჟუნი კალაფატისა და სანტიაგო სოლარის გვერდით კიდევ ერთი დამოუკიდებელი ფიგურა გამოჩენილიყო.

კლუბის მკაცრი პასუხი

დღეს დილით რეალმა ყველა ეჭვი გაფანტა:

ინფორმაცია იმის შესახებ, თითქოს ჩვენი კლუბი საორგანიზაციო სტრუქტურაში სპორტული დირექტორის დამატებას განიხილავს, სრული სიცრუეა.

კლუბმა ხაზგასმით აღნიშნა, რომ სრულად ენდობა ამჟამინდელ ხელმძღვანელობას. მათი თქმით, სწორედ ამ მართვის მოდელმა მოუტანა რეალს ისტორიაში ერთ-ერთი ყველაზე წარმატებული პერიოდი, მათ შორის 6 ჩემპიონთა ლიგის ტიტული ბოლო 10 წელიწადში.

რეალი დღეს საღამოს სანტიაგო ბერნაბეუზე ჟირონას უმასპინძლებს, რის შემდეგაც გერმანიაში გაფრინდება, სადაც ოთხშაბათს, ჩემპიონთა ლიგის მეოთხედფინალის განმეორებით შეხვედრაში, მიუნხენის ბაიერნს დაუპირისპირდება.