რიბერი ეპშტეინის ფაილებში - ფრანგის გარემოცვა ცრუ ინფორმაციაზე მიუთითებს

როგორც ჩანს, ეპშტეინის სკანდალს ფრანგული ფეხბურთისთვისაც არ აუვლია გვერდი.

თებერვლის დასაწყისში ამერიკის იუსტიციის სისტემამ მილიონობით დოკუმენტი გამოაქვეყნა, რომლებიც სექსუალურ დანაშაულებში ბრალდებულ ამერიკელ ბიზნესმენ ჯეფრი ეპსტაინს ეხება. ამ ფაილებში, რომლებიც სხვადასხვა ცნობილ ფიგურასთან მულტიმილიონერის კავშირებს ავლენს, ფრანკ რიბერის სახელიც ფიგურირებს. - სტატიას ფრანგული RMC Sport ავრცელებს.

საფრანგეთის ნაკრების ყოფილი ფეხბურთელი აშშ-ის იუსტიციის დეპარტამენტის მიერ გამოქვეყნებულ დოკუმენტში ექვსჯერ არის ნახსენები. ფრანკ რიბერი მოხსენიებულია მესამე პირის განცხადებაში, სადაც საუბარია ძალადობრივ ინციდენტებსა და პროსტიტუციის ქსელზე.

„ფრანკ რიბერიმ ჩემთვის დარტყმა სცადა, როცა ჩემს ბაღში ვიყავი; მან ჩემი ტელეფონის ნომერი და მისამართი მიიღო, პოლიციელებმა ის ალყაში მოაქციეს და თავის მანქანასთან დააბრუნეს“, - წერია დოკუმენტში.

დღემდე არ არსებობს ინფორმაცია, რომ ბაიერნისა და მარსელის ყოფილი ფეხბურთელის წინააღმდეგ ამ ბრალდებებზე დაყრდნობით რაიმე სამართლებრივი პროცედურა დაწყებულიყო.

„ეს არის ყალბი ამბავი! მე, როგორც ბატონი რიბერის ადვოკატი, მოქმედებას დავიწყებ და განვახორციელებ ყველა აუცილებელ სამართლებრივ ნაბიჯს, რათა დაისაჯონ ამ ყალბი ინფორმაციის გამავრცელებლები, რაც ჩემი კლიენტისა და მისი ოჯახის ღირსებაზე თავდასხმაა.“ - განაცხადა მისმა ადვოკატმა, ბრუზა კარლო ალბერტომ.

ნიუ-იორკის ელიტარული წრეების ერთ-ერთი თვალსაჩინო ფიგურა 1990-იან და 2000-იან წლებში, ჯეფრი ეპშტეინი ბრალდებული იყო ათასზე მეტი ახალგაზრდა ქალის, მათ შორის არასრულწლოვნების, სექსუალურ ექსპლუატაციაში. იგი 2019 წელს ნიუ-იორკის ციხის საკანში სასამართლო პროცესის დაწყებამდე ჩამომხრჩვალი იპოვეს.