მადრიდის რეალის საპრეზიდენტო არჩევნებში ფლორენტინო პერესის მთავარი კონკურენტი, ენრიკე რიკელმე, შეტევაზე გადადის და ამომრჩეველთა გულების მოგებას ხმაურიანი სატრანსფერო დაპირებებით გეგმავს.
Cox-ის ჯგუფის აღმასრულებელი დირექტორი აცხადებს, რომ გამარჯვების შემთხვევაში, გუნდს მყისიერად ორ სუპერვარსკვლავს დაამატებს.
გამოცემა ABC-სთან ინტერვიუში რიკელმემ დაადასტურა, რომ კონტრაქტები უკვე შეთანხმებულია:
ტრანსფერები დახურულია. მადრიდის რეალისთვის ორი უდიდესი საერთაშორისო ვარსკვლავი მყავს გაფორმებული. შეთანხმების მიხედვით, თუ მე გავხდები პრეზიდენტი, ეს ორი მოთამაშე რეალში ითამაშებს. ისინი აუცილებელია კლუბის მოკლე, საშუალო და გრძელვადიანი სპორტული პროექტისთვის. პარალელურად, ახალი მწვრთნელის კანდიდატურაზეც ვმუშაობთ
კითხვაზე, აპირებს თუ არა ამ ფეხბურთელების ვინმეს ვინაობის გამჟღავნებას უახლოესი ორი კვირის განმავლობაში, მან მოკლედ უპასუხა: „სავარაუდოდ, კი“.
ვალენსიაში გამართულ ღონისძიებაზე რიკელმემ ფლორენტინო პერესის სატრანსფერო პოლიტიკა მკაცრად გააკრიტიკა და აქცენტი ესპანელი ფეხბურთელების ნაკლებობაზე გააკეთა:
„ეს სევდიანი დღეა მადრიდის რეალისთვის - მსოფლიო ჩემპიონატზე ესპანეთის ნაკრებში კლუბიდან არცერთი მოთამაშე არ არის გამოძახებული.“
რიკელმემ ასევე აღნიშნა, რომ რეალის წევრებს (სოსიოსებს) სხვადასხვა სპორტული პროექტის მოსმენისა და მომავლის არჩევის უფლება უნდა ჰქონდეთ. ამის გამო, მან საარჩევნო ყუთებთან მისვლამდე ფლორენტინო პერესის კანდიდატურასთან პირდაპირი დებატების გამართვა ოფიციალურად მოითხოვა.
