როგორ შეძლო უნგრეთმა კვარაცხელიას განეიტრალება

საქართველოს ეროვნული ნაკრები ერთა ლიგის B დივიზიონის მესამე ტურში უნგრეთთან მინიმალური ანგარიშით, 0:1 დამარცხდა.

შეხვედრის დასრულების შემდეგ მეტოქე გუნდის მოთამაშეებმა, ჟოლტ ნადმა და ატილა ოშვატმა განვლილი დაპირისპირება შეაფასეს.

ჟოლტ ნადის თქმით, უნგრეთის ნაკრებმა მოედანზე მაქსიმუმი გაიღო და მნიშვნელოვანი სამი ქულა მოიპოვა. მისი აზრით, თამაშის მიმდინარეობისას იგრძნობოდა, რომ იღბალი მათ მხარეს იყო, თუმცა ქართველმა ფეხბურთელებმაც ყველაფერი გააკეთეს სასურველი შედეგის მისაღწევად.

ატილა ოშვატმა კი ყურადღება იმ ტაქტიკურ გეგმაზე გაამახვილა, რომლითაც საქართველოს ნაკრების შეტევის ხაზი განეიტრალდა. უნგრელი მცველის თქმით, მათ წინასწარ ჩაატარეს ვიდეოანალიზი და ზუსტად იცოდნენ, როგორ უნდა ემოქმედათ ხვიჩა კვარაცხელიას წინააღმდეგ.

ვფიქრობ, კარგი თამაში ჩავატარეთ და მეტოქე გუნდის ფეხბურთელებს სივრცეები არ დავუტოვეთ. საქართველოს ნაკრებს კარგი ფეხბურთელები ჰყავს და ისინი გუნდურად გავანეიტრალეთ. რაც შეეხება ხვიჩა კვარაცხელიას, ვიდეოანალიზი ჩატარებული გვქონდა და ზუსტად ვიცოდით, გუნდურად მის წინააღმდეგ რის გაკეთება გვინდოდა. ბედნიერი ვარ, რომ კვარაცხელია საქართველოს ნაკრებს ბევრი ვერაფრით დაეხმარა და მისი თამაშიდან გამოთიშვა მოვახერხეთ.

მან აღნიშნა, რომ კვარას წინააღმდეგ მუდმივად ორმაგ დაცვას იყენებდნენ და თავისუფალ სივრცეებს საერთოდ არ უტოვებდნენ, ხოლო ნახევარდაცვა ზურგს უმაგრებდათ, რათა ქართველ ნახევარმცველებს თავისუფალი ზონები არ აეთვისებინათ. ამ კოლექტიურმა პრესინგმა და მჭიდრო თამაშმა საქართველოს ნაკრების ლიდერს შესაძლებლობების გამოვლენის საშუალება არ მისცა.

შეხვედრის ერთადერთი გოლი 35-ე წუთზე მილოშ კერკეზმა გაიტანა. საქართველოს ნაკრები უგოლო სერიის დასრულებასა და სიტუაციის გამოსწორებას 5 ოქტომბერს, ჩრდილოეთ ირლანდიასთან გასვლით შეხვედრაში შეეცდება.