რა შანსები აქვს ჩვენს გუნდს ჯგუფის ლიდერის წინააღმდეგ: სრული ანალიზი

ორშაბათს, 5 ოქტომბერს, საქართველოს ეროვნული ნაკრები ერთა ლიგის B დივიზიონის მეოთხე ტურის მატჩში ჩრდილოეთ ირლანდიას ესტუმრება. შეხვედრა ბელფასტში, უინძორ პარკზე გაიმართება.

გუნდები ამ მატჩს რადიკალურად განსხვავებული განწყობით ხვდებიან. მასპინძლები ჯგუფს 7 ქულით ლიდერობენ და ფიფას რეიტინგში 64-ე პოზიციას იკავებენ. ამის საპირისპიროდ, ჩვენს გუნდს მხოლოდ 1 ქულა აქვს და რეიტინგში 74-ე ადგილზეა. სატურნირო მდგომარეობიდან გამომდინარე, საქართველოს ნაკრებს მომდევნო ეტაპზე გასასვლელად მართლაც სასწაული სჭირდება, თუმცა ბელფასტში ქულებისთვის ბრძოლა მაინც პრინციპულია.

ისტორია და სტატისტიკა ჩვენს სასარგებლოდ ნამდვილად არ მეტყველებს. ჩრდილოეთ ირლანდიამ ბოლო ორ ურთიერთშეხვედრაში გაიმარჯვა (4:1 და 1:0). გარდა ამისა, მასპინძლები შესანიშნავ ფორმაში არიან და საკუთარ მოედანზე თავს იდეალურად იცავენ, უინძორ პარკზე ჩატარებულ ბოლო 10 მატჩიდან 8-ში მათ საკუთარი კარი მშრალად შეინახეს.

რაც შეეხება უშუალოდ თამაშის სცენარს და მოლოდინებს, სპორტული ანალიტიკოსები საკმაოდ დახურულ და ნაკლებშედეგიანი მატჩს პროგნოზირებენ. ბოლო პერიოდში ორივე გუნდს უჭირს მომენტების რეალიზება და გოლების გატანა. შესაბამისად, ლოგიკური იქნება ვივარაუდოთ, რომ შეხვედრაში ბევრი გოლი არ გავა და დიდია ალბათობა, ყველაფერი დაცვაში უშეცდომო თამაშმა გადაწყვიტოს.

ინდივიდუალურ მონაცემებს თუ გადავხედავთ, მასპინძლები დიდ იმედებს ამყარებენ კიარონ ბრაუნზე, რომელმაც ბოლო 6 სანაკრებო შეხვედრაში 2 გოლი გაიტანა. საქართველოს ნაკრების მხრიდან კი შეტევაში მთავარი იმედი გიორგი მიქაუტაძე იქნება, რომლის ანგარიშზეც ეროვნული გუნდის მაისურით ჩატარებულ ბოლო ექვს თამაშში ასევე 2 გატანილი ბურთია. არ უნდა დავივიწყოთ ხვიჩა კვარაცხელია, რომელსაც რამდენიმე წამში თამაშის ბედის შეცვლა შეუძლია.