"როგორც ფეხბურთელი, ხალხის გვერდით ვარ" - ტარემის მხარდაჭერა ირანელებს

საბერძნეთის სუპერ ლიგის მე-16 ტურში ოლიმპიაკოსი ატრომიტოსს ესტუმრა და 0-2 დაამარცხა.

პირეოსული გუნდის მხრიდან გოლი და საგოლე გადაცემა მიითვალა მეჰდი ტარემიმ, რომელმაც თავისი გოლი მოკრძალებულად აღნიშნა.

მოგებული მატჩის შემდეგ ირანელმა ფეხბურთელმა აღნიშნულთან დაკავშირებით კომენტარი გააკეთა.

„ის რომ გოლი არ აღვნიშნე, დაკავშირებულია ჩემს ქვეყანაში არსებულ მდგომარეობასთან.

როგორც ფეხბურთელი, მე ხალხის გვერდით ვარ.

ეს ყველაფერი ჩემს ქვეყანაში მთავრობისა და ხალხის დაპირისპირებას უკავშირდება. ასეთ დროს ვერ შევძლებდი ბედნიერად ყოფნას.

სოლიდარობას ვუცხადებ ხალხს. გოლი ირანელი ხალხის მხარდაჭერის ნიშნად არ აღვნიშნე.“ - განაცხადა 33 წლის ფეხბურთელმა, რომელსაც ირანის ნაკრებში 101 მატჩში 56 გოლი აქვს გატანილი.

რამდენიმე დღეა ირანში დიდი საპროტესტო ტალღაა აგორებული, რომელმაც უკვე ბევრი ქალაქი მოიცვა. ქუჩებში მილიონობით ხალხი არის გამოსული და რეჟიმის წინააღმდეგ იბრძვის.

საპროტესტო მსვლელობებს მოჰყვა მთავრობასა და ხალხს შორის შეტაკებებიც, რომელსაც უკვე ათეულობით ადამიანი ემსხვერპლა.