რომელ მატჩებს გამოტოვებს? — ბელინგემის ტრავმის სიმძიმე ცნობილია

რაიო ვალეკანოსთან გამარჯვება (2:1) რეალს ერთ-ერთი ლიდერის დაკარგვის ფასად დაუჯდა.

მატჩის პირველივე ნახევარში ტრავმა მიიღო და თამაში ვეღარ გააგრძელა ჯუდ ბელინგემმა, რომლის ნაცვლად შემოსულმა ბრაჰიმ დიასმა ბოლო წამებზე პენალტი მოიპოვა და რეალს 3 ქულის მოპოვებაში დაეხმარა.

როგორც მადრიდული კლუბის ოფიციალური ვებ-გვერდი იტყობინება, ინგლისელ ნახევარმცველს მარცხენა ბარძაყის კუნთი აქვს დაზიანებული. 

ესპანური პრესის ცნობით, აღნიშნული ტრავმის სრულად მოსაშუშებლად ბელინგემს დაახლოებით ერთი თვე დასჭირდება.

ეს კი იმას ნიშნავს, რომ დიდი ალბათობით ფეხბურთელი რეალს ჩემპიონთა ლიგის 1/16 ფინალში ბენფიკასთან გასამართ ორივე შეხვედრაში დააკლდება. 

საერთო ჯამში, ჯუდი შემდეგ თამაშებს გამოტოვებს:

ვალენსიასთან (8 თებერვალს), სოსიედადთან (14 თებერვალს), ბენფიკასთან (17 თებერვალს), ოსასუნასთან (22 თებერვალს) და ბენფიკასთან (26 თებერვალს). 

სავარაუდოდ, მისი დაბრუნება 1 მარტს, ხეტაფესთან საშინაო მატჩში შედგება.