ოქროს ბურთის ნომინანტებს შორის მოხვედრა ყოველთვის არ ნიშნავს, რომ ფეხბურთელი გამოკითხვაში ქულას მაინც მიიღებს.
წლების განმავლობაში ასეთი შედეგი არაერთ ცნობილ მოთამაშეს ჰქონია, მათ შორის - ჯილდოს ყოფილ მფლობელებსაც.
2016 წელს ოქროს ბურთის დამოუკიდებლად გადაცემის უფლება France Football-ს დაუბრუნდა. გამოცემა 30 კანდიდატს ასახელებს, გამარჯვებული კი გამოკითხვის შედეგად ვლინდება.
ხმის მიცემის მოქმედი ფორმატით, ექსპერტები ათ საუკეთესო ფეხბურთელს არჩევენ და ადგილების მიხედვით ანაწილებენ. პირველ ადგილზე გასული მოთამაშე 15 ქულას იღებს, მეორე - 12-ს, მესამე - 10-ს და ასე შემდეგ. საბოლოოდ, ქულები ჯამდება და გამარჯვებულიც ამ გზით განისაზღვრება.
თუმცა ზოგიერთ ნომინანტს საბოლოო ცხრილში ნული რჩება. 2016-2024 წლების ჩამონათვალში კრიშტიანუ რონალდუს, ლუკა მოდრიჩის, ანდრეს ინიესტასა და სხვა ვარსკვლავების გვარებსაც შეხვდებით.
2016 წელი
ამ წელს ქულის გარეშე დარჩნენ უგო ლორისი, სერხიო აგუერო, პაულო დიბალა, გონსალო იგუაინი, კევინ დე ბრუინი, დიეგო გოდინი, ანდრეს ინიესტა, კოკე, სერხიო რამოსი, თომას მიულერი და მანუელ ნოიერი.
2017 წელი
ქულა ვერ მიიღეს ფილიპე კოუტინიომ და დრის მერტენსმა.
2018 წელი
ნულოვანი შედეგი ჰქონდათ უგო ლორისსა და ისკოს. ლორისი ამ სიაში მეორედ მოხვდა - პირველად მას ასეთი შედეგი 2016 წელს ჰქონდა.
2019 წელი
ქულის გარეშე დარჩნენ ჟოაუ ფელიქსი, მარკინიოსი და დონი ვან დე ბეკი.
2021 წელი
ვერცერთი ქულა ვერ მოიპოვეს ლუკა მოდრიჩმა და სესარ ასპილიკუეტამ.
2022 წელი
ამ წელს ქულის გარეშე დარჩენილთა შორის იყვნენ კრიშტიანუ რონალდუ, ბერნარდუ სილვა, ჟოაუ კანსელუ, ჰარი კეინი, ტრენტ ალექსანდერ-არნოლდი, ფილ ფოდენი, იოზუა კიმიხი, ანტონიო რუდიგერი, მაიკ მენიაო, კრისტოფერ ნკუნკუ და დარვინ ნუნიესი.
2023 წელი
ქულა ვერ მიიღეს ჯამალ მუსიალამ, ნიკოლო ბარელამ, რანდალ კოლო მუანიმ, მარტინ ედეგორმა და რუბენ დიაშმა.
2024 წელი
გამოკითხვა ქულის გარეშე დაასრულეს მატს ჰუმელსმა და არტემ დოვბიკმა.
