რონალდუ - პრობლემა პორტუგალიის ნაკრებში?

მანჩესტერ იუნაიტედის ლეგენდამ, პოლ სქოულზმა განაცხადა, რომ კრიშტიანუ რონალდუ პორტუგალიის ნაკრებისთვის პრობლემად იქცა.

ყოფილი ნახევარმცველი მიიჩნევს, რომ 41 წლის ვარსკვლავი საშინლად განრისხდებოდა იმის დანახვაზე, თუ როგორ შეასრულა მისმა მარადიულმა მეტოქემ, ლიონელ მესიმ ჰეთ-თრიკი ალჟირთან მატჩში.

„41 წლის ასაკში მხოლოდ მეკარემ უნდა ითამაშოს“

პორტუგალიის ნაკრებმა მუნდიალის სასტარტო შეხვედრაში კონგოს დემოკრატიულ რესპუბლიკასთან ფრე (1:1) ითამაშა, რონალდუმ კი მოედანზე არაფრით გამოიჩინა თავი. სქოულზმა პოდკასტში The Good, The Bad & The Football აღნიშნა, რომ რობერტო მარტინესს უმძიმესი გადაწყვეტილების მიღება უწევს.

მარტინესს კამერების მიღმა პირადად ვკითხე, იყო თუ არა რონალდუ მისთვის პრობლემა. ჩემი აზრით, ის ნამდვილად პრობლემაა. 41 წლის ასაკში მოედანზე მხოლოდ ერთი პოზიცია არსებობს, სადაც ფეხბურთელმა მატჩი სასტარტო შემადგენლობიდან უნდა დაიწყოს - ეს მეკარეა. რონალდუ მაქსიმუმ ბოლო 15 წუთზე უნდა შემოდიოდეს.

მესისა და მბაპეს ფაქტორი

სქოულზის თქმით, კრიშტიანუს იმედგაცრუებას კონკურენტების წარმატებული სტარტი კიდევ უფრო გაამწვავებს. სანამ პორტუგალიელი პირველ ტაიმში დარტყმის გარეშე დარჩა, მესიმ ჰეთ-თრიკი შეასრულა, კილიან მბაპემ კი დუბლი გაიფორმა.

კრიშტიანუ საშინლად გაბრაზდება, რადგან მესიმ სამი გოლი გაიტანა, მბაპემ ორი... ეს მას უბრალოდ მოკლავს. მეცოდება მარტინესი, რადგან ის საჯაროდ ამბობს, რომ მსოფლიოს საუკეთესო ბომბარდირი ჰყავს, თუმცა გულში კარგად იცის, რომ ეს მის გუნდს მხოლოდ აზიანებს

კრიტიკის მიუხედავად, რობერტო მარტინესი კაპიტნის სკამზე დასმას არ აპირებს. მწვრთნელმა განაცხადა, რომ როდესაც გუნდს გოლები სჭირდება, მოედანზე რონალდუსნაირი გამოცდილი ფორვარდის ყოფნა და მცველების ყურადღების მიპყრობა სასიცოცხლოდ მნიშვნელოვანია. უზბეკეთთან მომავალ მატჩში კრიშტიანუ ისევ ძირითადში იწყებს.