რონალდუ: "რატომ არ ვიყავი დიოგუ ჟოტას დაკრძალვაზე?"

პირს მორგანთან ინტერვიუში კრიშტიანუ რონალდუმ დიოგუ ჟოტას ტრაგიკულ გარდაცვალებაზე ისაუბრა.

„არ მჯეროდა, როცა მესიჯები გამომიგზავნეს… ბევრი ვიტირე. ჯორჯინამაც შეიძლება დაადასტუროს ეს. ეს იყო ძალიან, ძალიან რთული მომენტი - ქვეყნისთვის, ოჯახებისთვის, მეგობრებისთვის, თანაგუნდელებისთვის. ძალიან, ძალიან, ძალიან სამწუხარო ამბავი.

ეს იყო შოკის მომენტი… დღესაც იგრძნობა მისი აურა ეროვნულ ნაკრებში, როცა მაისურს იცვამ, რადგან დიოგუ ჩვენიანია.

ის იყო ძალიან კარგი ადამიანი, მშვიდი ბიჭი, ასევე კარგი ფეხბურთელი. მიხაროდა, რომ ვიცნობდი და მქონდა შანსი მასთან ერთად გამეზიარებინა შესანიშნავი მომენტები. ეს ძალიან სამწუხარო ამბავი იყო. მქონდა შესაძლებლობა მის ოჯახს დავლაპარაკებოდი და მათთვის მხარდაჭერა გამომეხატა.

რატომ არ დავესწარი მის დაკრძალვას? მამაჩემის გარდაცვალების შემდეგ, მე აღარასდროს ვყოფილვარ დაკრძალვებზე. სადაც არ უნდა წავიდე, ყველაფერი ცირკად იქცევა და ყურადღება ჩემზე გადმოდის. ეს სწორი არ იქნებოდა. მის ოჯახზე ვფიქრობდი.

ადამიანებს შეუძლიათ გააგრძელონ ჩემი კრიტიკა... მე მშვიდად ვარ ჩემი გადაწყვეტილებით. არ მჭირდება პირველ რიგში დგომა, რომ ხალხმა დამინახოს... ყველაფერზე წინასწარ ვფიქრობ, ვფიქრობდი მის ოჯახზე. არ მჭირდება კამერების წინ ყოფნა იმისთვის, რომ ხალხმა დაინახოს, რასაც ვაკეთებ.“ - განაცხადა რონალდუმ.