რონალდუს მესამე შანსი მანჩესტერში?

დათანხმდებოდა თუ არა კრიშტიანუ რონალდუ მანჩესტერ იუნაიტედში დაბრუნებას, თუ ამას მაიკლ კერიკი სთხოვდა?

ლუი საჰა რეკორდების დევნასა და სათადარიგო სკამზე ყოფნის პერსპექტივას განიხილავს.

კრიშტიანუ რონალდუ მაიკლ კერიკთან ერთად მანჩესტერ იუნაიტედში თამაშობდა. დათანხმდებოდა თუ არა პორტუგალიელი ლეგენდა ოლდ ტრაფორდზე დაბრუნებას, თუ ამას კლუბის ამჟამინდელი თავკაცი სთხოვდა? ლუი საჰამ, რომელიც რონალდუს კიდევ ერთი ყოფილი თანაგუნდელია, განმარტა, თუ რატომ შეიძლება გახდეს რეკორდების დევნა და სათადარიგო სკამი ამ გეგმის ხელისშემშლელი ფაქტორი.

რონალდუმ სუპერვარსკვლავობისკენ პირველი ნაბიჯები სწორედ წითელ ეშმაკებში 2003 წელს გადადგა. ის ინგლისში სწრაფი გარემარბის სტატუსით ჩავიდა, თუმცა ყველა დროის საუკეთესო ბომბარდირად იქცა. მან კლუბთან ერთად პრემიერლიგა, ჩემპიონთა ლიგა და თავისი პირველი ოქროს ბურთი მოიგო.

2021 წელს ის სულიერ სახლში ემოციურად დაბრუნდა, თუმცა ერიკ ტენ ჰაგთან კონფლიქტისა და პიერს მორგანთან სკანდალური ინტერვიუს შემდეგ, კონტრაქტი 2022 წლის ნოემბერში გაუწყვიტეს. მალევე მან ალ-ნასრთან მსოფლიო ფეხბურთის ისტორიაში ყველაზე სარფიანი ხელშეკრულება გააფორმა. 41 წლის ფორვარდი ახლა მეექვსე მსოფლიო ჩემპიონატისთვის ემზადება და ევროპაში დაბრუნებას არ გამორიცხავს.

მაიკლ კერიკმა, რომელმაც გუნდს ჩემპიონთა ლიგის საგზური მოუპოვა და მთავარი მწვრთნელის პოსტზე დასამკვიდრებლად იბრძვის, შესაძლოა რონალდუს დაბრუნებაზე იფიქროს. თუმცა, ლუი საჰა ამის შესაძლებლობას სკეპტიკურად უყურებს:

დაფიქრება, რა თქმა უნდა, შეიძლება, მაგრამ არ მგონია, ეს განხორციელდეს. მანჩესტერ იუნაიტედსაც თავისი მომავალი აქვს და კრიშტიანუ რონალდუსაც. ეს ორი ისტორია ერთმანეთს კარგად აღარ ეწყობა. კრიშტიანუს ისევ სურს რეკორდების მოხსნა და ის თავს უფლებას არ მისცემს, სათადარიგო სკამზე იჯდეს

საჰას აზრით, რონალდუს ამბიციები და გუნდის საჭიროებები ამ ეტაპზე თანხვედრაში არ არის. პორტუგალიელის კონტრაქტი საუდის არაბეთში 2027 წლამდეა გათვლილი, რაც იმას ნიშნავს, რომ ამ ზაფხულს ახალი გამოწვევის ძებნა აუცილებლობას არ წარმოადგენს.