რუბენ ამორიმი შესაძლოა სამშობლოში დაბრუნდეს

რუბენ ამორიმმა შესაძლოა მანჩესტერ იუნაიტედი დატოვოს.

როგორც Daily Mail იტყობინება, პორტუგალიელი სპეციალისტის დანიშვნა ბენფიკას პრეზიდენტობის კანდიდატს, ჟოაო ნორონია ლოპესს სურს და არჩევნებში გამარჯვების შემთხვევაში, გუნდის მთავარ მწვრთნელად სწორედ ამორიმის დანიშვნას შეეცდება.

თავის მხრივ, Sky Sports ამბობს, რომ მანჩესტერ იუნაიტედში ამორიმის გაშვება დღის წესრიგში კვლავაც არ დგას, მიუხედავად იმისა, რომ პორტუგალიელს მსოფლიო ომის შემდეგ მწვრთნელებს შორის გამარჯვების ყველაზე დაბალი პროცენტული მაჩვენებელი აქვს.

ხელმძღვანელობას მიაჩნია, რომ მოედანზე გუნდის მიერ ნაჩვენები თამაში შედეგებზე არ აისახება და თუნდაც მანჩესტერულ დერბიში დაფიქსირებული ანგარიში (0:3) არ ასახავს იმას, რა ხდებოდა მოედანზე რეალურად.

საინტერესოა, რომ მწვრთნელის რანგში თავის მთავარ წარმატებებს ამორიმმა ბენფიკას მთავარ კონკურენტ და თანაქალაქელ სპორტინგში მიაღწია, ფეხბურთელობისას კი ბენფიკაში 9 წელი აქვს გატარებული.