საქართველო-თურქეთის მატჩს იტალიელი მსაჯები განსჯიან

2026 წლის მსოფლიო ჩემპიონატის საკვალიფიკაციო ეტაპის პირველ მატჩში, საქართველოსა და თურქეთის ნაკრებებს შორის, მსაჯების ვინაობა ცნობილი გახდა.

უეფას ოფიციალური გვერდის ცნობით, 4 სექტემბერს დინამო არენაზე გასამართ შეხვედრას იტალიელი არბიტრები გაუძღვებიან.

მთავარი მსაჯი დავიდე მასა იქნება, მას ასისტენტობას ფილიპო მელი და სტეფანო ალასიო გაუწევენ. მეოთხე მსაჯი მატეო მარჩენარო იქნება. ვიდეო ასისტენტ რეფერის ოთახიდან მასას მარკო დი ბელო და დანიელე დოვერი დაეხმარებიან.

დავიდე მასა საქართველოს ნაკრების მატჩს პირველად განსჯის. 

44 წლის იტალიელმა სერია ა-ს ახლად დაწყებულ სეზონში ჯენოასა და ლეჩეს (0-0) შეხვედრაში იმუშავა და მოთამაშეებს 5 ყვითელი ბარათი უჩვენა.