საქართველოს ნაკრები 2027 წლის რაგბის მსოფლიო თასის ჯგუფში ტურნირის ბოლო ორი გათამაშების (2019 და 2023) ჩემპიონ სამხრეთ აფრიკასთან, იტალიასთან და რუმინეთთან ერთად მოხვდა.
იტალიელთა მთავარმა მწვრთნელმა, გონსალო კესადამ ჩვენი გუნდის შესახებ კომენტარი გააკეთა:
"უნდა გავითვალისწინოთ, რომ საქართველო ბოლო წლებში ორიოდ საფეხურით ჩამოგვრჩებოდა, მაგრამ დღეს ჩინებული გუნდია.
მათთან ისე უნდა მოვემზადოთ, როგორც ჩვენს ტოლ-სწორ გუნდთან. თამაშის დახურვას შეეცდებიან და ჩვენი ძლიერი თვისებების გამოვლენაში შეგვიშლიან ხელს.
ვფიქრობ, ძალიან დიდი მნიშვნელობა ექნება იმას, რომელ გუნდს რომლის შემდეგ ვეთამაშებით. ამაზე ჩემი მოსაზრება გამაჩნია, თუმცა ჯერჯერობით ჩემთვის შევინახავ", - აღნიშნა კესადამ.
ბორჯღალოსნებს იტალიის ნაკრებთან ისტორიაში 4 ურთიერთშეხვედრა აქვთ ჩატარებული - ყველა მათგანი 2014 წლის შემდეგ გაიმართა და გუნდებმა 2-2 გამარჯვება მოიპოვეს. სულ ბოლო თამაში 2024 წლის ნოემბერში, გენუაში შედგა - აპენინელებმა 20:17 მოიგეს.
მსოფლიო თასზე სულ 6 ჯგუფია, თითოეულიდან 2-2 საუკეთესო პლეი-ოფში პირდაპირ გავა, ასევე ამავე საგზურს მიიღებს 4 საუკეთესო მესამეადგილოსანიც.
ისტორიაში რიგით მე-11 მსოფლიო თასი ავსტრალიაში, 1-ელი ოქტომბრიდან 13 ნოემბრის ჩათვლით, გაიმართება.
