სასიცოცხლოდ მოსაგები მატჩი დაცვის, ვალვერდეს და მბაპეს გარეშე — ალონსო შარშია

მადრიდის რეალი 14 დეკემბერს სტუმრად ალავესს დაუპირისპირდება მატჩში, რომელიც, გავრცელებული ინფორმაციით, ჩაბი ალონსოს მომავალს გადაწყვეტს.

როგორც ესპანური პრესა წერს, კლუბმა ალონსოს ულტიმატუმი წაუყენა - თუ წლის ბოლომდე გუნდი ერთ თამაშს მაინც ვერ მოიგებს, ის მთავარი მწვრთნელის თანამდებობიდან იქნება გათავისუფლებული.

ალავესის სტუმრად დამარცხება არც ისეა ძალიან მარტივი ამოცანა, ხოლო რეალის შემთხვევაში — მითუმეტეს, რადგან ამ შეხვედრაში ალონსოს განკარგულებაში მხოლოდ ერთი (!) მცველი იქნება ხელმისაწვდომი. 

მცველების გარდა, თამაშს უდიდესი ალბათობით გამოტოვებენ ფედე ვალვერდე და კილიან მბაპეც — ამ უკანასკნელმა სიტისთან თამაშიც მუხლის დისკომფორტის გამო გამოტოვა და როგორც წერენ, მომჯობინება კვლავ ვერ შეძლო.

სიტუაცია ალავესთან მატჩის წინ კი კონკრეტულად ასეთია. ტრავმირებულები ან დისკვალიფიცირებულები არიან: კარვახალი, მილიტაო, ალაბა, კამავინგა, ვალვერდე (?), ენდრიკი, მბაპე (?), ტრენტი, კარერასი, ფრან გარსია, რუდიგერი (?), მენდი, ჰაუსენი (?). კითხვის ნიშნებით აღნიშნულია ფეხბურთელები, რომელთა მონაწილეობაც ჯერ ბოლომდე არ არის გამორიცხული.

პირველი გუნდის ფეხბურთელებიდან ალონსოსთვის ხელმისაწვდომები იქნებიან: კურტუა, ბელინგემი, ვინისიუსი, როდრიგო, ლუნინი, ჩუამენი, არდა გიულერი, გონსალო გარსია, რაულ ასენსიო, სებალიოსი, ბრაჰიმი და ფრანკო მასტანტუონო — ეს უკანასკნელი ტრავმიდან ახლახანს დაბრუნდა და ჯერ არც უთამაშია.