იტალიის სერია A-ს პრეზიდენტმა, ეციო სიმონელიმ, ქვეყანაში აგორებულ მსაჯების ახალ სკანდალზე პირველი კომენტარი გააკეთა. მან აღნიშნა, რომ გამოძიების დასრულებამდე დეტალებში შესვლა არ შეუძლია.
შაბათს გავრცელდა ინფორმაცია, რომ მსაჯთა დამნიშნავი ჯანლუკა როკი გამოძიების ქვეშაა. საქმე ეხება ყოფილი ასისტენტის, დომენიკო როკას მიერ 2025 წლის მაისში შეტანილ საჩივარს. თავდაპირველად ეს საჩივარი არქივში გადაიგზავნა, თუმცა ახლა საქმე მილანის პროკურატურამ კვლავ ამოაგდო.
როკიმ გამოძიების შესახებ შეტყობინება პარასკევს (24 აპრილს) მიიღო. მას სპორტულ თაღლითობაში მონაწილეობას ედავებიან.
ინტერი სკანდალის ეპიცენტრში - მსაჯების საქმე
იტალიური მედიის ცნობით, როკი 2025 წლის 1 მარტს, უდინეზესა და პარმას მატჩის დროს VAR-ის პროცესში ჩაერია. ის VAR-ის ოთახის ფანჯარაზე აკაკუნებდა და მსაჯს პენალტის ეპიზოდის გადამოწმებას სთხოვდა. ასევე არსებობს ეჭვები, რომ 2024-25 წლების სეზონის ბოლოს როკი ცდილობდა დანიელე დოვერი ინტერის უმნიშვნელოვანესი მატჩებიდან ჩამოეშორებინა, რადგან დოვერი კლუბისთვის „არახელსაყრელ“ მსაჯად მიიჩნეოდა.
ეციო სიმონელიმ მომხდარზე შემდეგი კომენტარი გააკეთა:
მედიაში წაკითხულიდან გამომდინარე, მინდა შეგახსენოთ, რომ ეს არის გამომძიებლების ბრალდებები და ყველას მოვალეობაა, მათ სწორედ ასე შეხედოს. ნაჩქარევი მსჯელობა ან დასკვნები უადგილოა მანამ, სანამ გამოძიება სიმართლემდე არ მივა. ჩვენგან არავინ ფლობს დეტალებს და როგორც ამ საქმის მეთვალყურეები, ვალდებულნი ვართ საბოლოო განაჩენს დაველოდოთ.
