პლანეტის უდიდესი კუნძული, რომლის საფეხბურთო ნაკრებსაც საერთაშორისო აღიარება არ აქვს, ბოლო პერიოდში აქტიურად ცდილობს FIFA-ში, UEFA-ში ან CONCACAF-ში გაწევრიანებას, თუმცა სურვილი სურვილადვე რჩება - გრენლანდიის ნაკრებისთვის ჯერ-ჯერობით ყველა საერთაშორისო შეჯიბრების კარი დახურულია.
გრენლანდიის საერთაშორისო არენაზე გამოსვლას ხელს რამდენიმე ფაქტორი უშლის. კუნძული დანიის სამეფოს სუვერენული ტერიტორიაა, თუმცა გეოგრაფიულად იგი ჩრდილოეთ ამერიკის კონტინენტს ეკუთვნის.
კანონებისა და რეგულაციების თანახმად, FIFA-ში გაწევრიანებამდე ნებისმიერი ნაკრები ჯერ ადგილობრივი კონტინენტური კონფედერაციის წევრი უნდა გახდეს, რის მერეც მსოფლიო ფეხბურთის ორგანიზაციაში მიიღებენ.
UEFA თავის რიგებში მხოლოდ გეოგრაფიულად ევროპაში მდებარე და გაეროს მიერ აღიარებულ ქვეყნებს იღებს, შესაბამისად, გრენლანდია ევროპული ფეხბურთის მმართველ ორგანოში ორივე მიზეზის გამო ვერ წევრიანდება. სხვათა შორის, გრენლანდიას ზუსტად იგივე სტატუსი აქვს (დანიის სამეფოს ავტონომიური ტერიტორია), რაც - ფარერის კუნძულებს, თუმცა ფარერელებს სწორედ გეოგრაფიული მდებარეობა დაეხმარათ UEFA-ში შესასვლელად.
საინტერესოა, რომ მსგავსი შეზღუდვა არ აქვს ჩრდილო-ცენტრალური ამერიკისა და კარიბის ზღვის ზონის კონფედერაციას (CONCACAF), თუმცა მიუხედავად ამისა, სულ რაღაც ერთი კვირის წინ, ამ ზონაში გაწევრიანებაზე გრენლანდიამ CONCACAF-ისგან კიდევ ერთხელ მიიღო უარი.
საერთაშორისო საფეხბურთო ორგანიზაციებში გაწევრიანებაზე აქტიურად მუშაობს „პოლარული სათამაშო დათუნიების“ (გრინლანდიის ნაკრების მეტსახელი) დანიელი მთავარი მწვრთნელი მორტენ რუტკიაერი, რომელიც კუნძულელებს 2020 წლიდან ავარჯიშებს.
გასულ წელს რუტკიაერმა ღიად ისაუბრა, რომ გრენლანდიის CONCACAF-ში გაწევრიანება მთლიანად კუნძულელთა დიდი ოცნება იყო და თუ ეს მოხდებოდა, ახალგაზრდა ფეხბურთელებს მეტ სტიმულს მისცემდა, ნაკრებს კი დიდ გამოცდილებას მოუტანდა. მისივე თქმით, კუნძულზე ფეხბურთის თამაში მხოლოდ ხუთთვიან პერიოდშია შესაძლებელი, რადგან წელიწადის სხვა დროს გრენლანდიას თოვლი ფარავს.
1971 დაარსებული გრენლანდიის ფეხბურთის ასოციაციის (KAK) პრეზიდენტმა კენეტ კლაისტმა ერთი წლის წინ განაცხადა, რომ გეგმაშია რამდენიმე დახურული სტადიონის მშენებლობა, რათა არქტიკულ მკაცრ პირობებშიც შესაძლებელი იყოს საფეხბურთო მატჩების გამართვა.
გრენლანდიის ნაკრები არაოფიციალურ ამხანაგურ მატჩებს ძირითადად საფეხბურთო კლუბებთან და არაღიარებული ქვეყნების ნაკრებებთან მართავს, თუმცა გასული წლის 1-ელ ივნისს, თურქეთის დედაქალაქ ანკარაში, თურქმენეთის ეროვნულ გუნდს შეხვდა და 0:5 დამარცხდა.
გრენლანდიის მოსახლეობა დაახლოებით 57 ათასია, ამათგან თითქმის 90%-ს გრენლანდიელი ინუიტები შეადგენენ, 7.5%-ს კი - დანიელები. ოფიციალური ინფორმაციით, ფეხბურთს 5500 რეგისტრირებული ფეხბურთელი თამაშობს, რაც მოსახლეობის მხოლოდ 10% გახლავთ. კუნძულზე 76 მოქმედი საფეხბურთო კლუბია, რომელთა სტადიონები ძირითადად ხელოვნურ საფარიანია.
