შეთანხმება შედგა - პორტუგალიელი ტალანტი პრემიერ ლიგაში მიდის

ფაბრიციო რომანოს ინფორმაციით, ანტონიო სილვას ბორნმუთში ტრანსფერი შეთანხმებულია და კლუბებს შორის ყველა დოკუმენტი უკვე გაფორმებულია.

ტრანსფერის ღირებულება 25 მილიონი ევრო იქნება, რასაც 5 მილიონი ევროს ოდენობის ბონუსები დაემატება. ბენფიკამ 22 წლის ცენტრალურ მცველს უკვე მისცა ნებართვა, გაემგზავროს ინგლისში, სადაც სამედიცინო შემოწმებას გაივლის.

სილვას ბენფიკასთან კონტრაქტი კიდევ ერთი წლით აკავშირებს. ის ამ შაბათ-კვირას სამედიცინო შემოწმებას გაივლის, რის შემდეგაც ოფიციალურად შეუერთდება პრემიერ ლიგის კლუბს.

პორტუგალიელი მცველი ბორნმუთს მნიშვნელოვან საერთაშორისო გამოცდილებასაც შესძენს, მის ანგარიშზეა ჩემპიონთა ლიგის 29 მატჩი და ევროპა ლიგის 6 შეხვედრა.

გარდა ამისა, კარიერის განმავლობაში მან ბენფიკასთან ერთად 4 ტიტული მოიგო, ხოლო 2025 წელს პორტუგალიის ნაკრებთან ერთად ერთა ლიგის გამარჯვებულიც გახდა.

სილვამ ბენფიკას აკადემია გაიარა და პირველ გუნდში 2022 წელს დაწინაურდა. მას შემდეგ ლისაბონური კლუბის მაისურით 181 მატჩი ჩაატარა, 10 გოლი გაიტანა და გუნდის ერთ-ერთ ლიდერად ჩამოყალიბდა.

გასულ სეზონში, ჟოზე მოურინიოს ხელმძღვანელობით, სილვამ ყველა ტურნირზე 41 შეხვედრაში მიიღო მონაწილეობა, ხოლო ბენფიკა პორტუგალიის ჩემპიონატში მესამე ადგილზე გავიდა.

პორტუგალიის ეროვნულ ნაკრებში სილვას 20 მატჩი აქვს ჩატარებული. მისი დებიუტი 2022 წელს შედგა. ის 2022 წლის მსოფლიო ჩემპიონატისა და 2024 წლის ევროპის ჩემპიონატის განაცხადშიც იყო, თუმცა 2026 წლის მსოფლიო ჩემპიონატზე ნაკრებთან ერთად ვერ გაემგზავრა.

ამ ზაფხულს ბორნმუთი ცენტრალურ მცველ მარკოს სენესის დაემშვიდობა, რომელმაც კონტრაქტის დასრულების შემდეგ ტოტენჰემს მიაშურა.

თუ ტრანსფერი ოფიციალურად დადასტურდება, ანტონიო სილვა ბორნმუთის მეორე ზაფხულის შენაძენი იქნება. პირველი ახალწვეული თავდამსხმელი ალვარო როდრიგესი გახდა, რომელიც კლუბს მიმდინარე თვეში ელჩედან შეუერთდა.