ოფიციალურად: ჟოზე მოურინიო რეალის მწვრთნელია!

მადრიდის რეალმა ჟოზე მოურინიოს კლუბის მთავარი მწვრთნელის პოსტზე დანიშნვა დაადასტურა.

ოფიციალურ განცხადებაში სამეფო კლუბი აღნიშნავს: „მადრიდის რეალის დირექტორთა საბჭომ მიიღო გადაწყვეტილება, დანიშნოს ჟოზე მოურინიო პირველი გუნდის მწვრთნელად მომდევნო სამი სეზონის განმავლობაში, 2029 წლის 30 ივნისამდე“.

63 წლის მოურინიო ესპანურ კლუბს ბენფიკაში გატარებული ერთი სეზონის შემდეგ უბრუნდება. პორტუგალიურმა კლუბმა ოთხშაბათს დაადასტურა, რომ მადრიდელები მზად იყვნენ 15 მილიონი ევროს ოდენობის კომპენსაცია გადაეხადათ მისი კონტრაქტის გასაწყვეტად.

რეალის პრეზიდენტმა, ფლორენტინო პერესმა, მოურინიოს დაბრუნება თავის ერთ-ერთ მთავარ საარჩევნო დაპირებად აქცია, რაც კლუბის წევრების კენჭისყრაში გასულ შაბათ-კვირას გამარჯვებაში დაეხმარა.

მოურინიო მადრიდში ბრუნდება დავალებით, რომ გუნდს წარმატება დაუბრუნოს მას შემდეგ, რაც რეალმა ორი სეზონი ტიტულების გარეშე გაატარა კარლო ანჩელოტის, ხაბი ალონსოსა და ალვარო არბელოას ხელმძღვანელობით.

პორტუგალიელი სპეციალისტი რეალს 2010-დან 2013 წლამდე წვრთნიდა, რა დროსაც მან მოიგო ლა ლიგა, ესპანეთის თასი და ესპანეთის სუპერთასი. ასევე იგი სამჯერ გავიდა ჩემპიონთა ლიგის ნახევარფინალში. სანტიაგო ბერნაბეუს დატოვების შემდეგ ჟოზე წვრთნიდა ჩელსის, მანჩესტერ იუნაიტედს, ტოტენჰემს, რომას, ფენერბაჰჩესა და ბენფიკას.

მოურინიოს ბოლო ტიტული ოთხი წლის წინ მოპოვებული უეფას კონფერენს ლიგაა რომასთან ერთად, ხოლო ბოლო საჩემპიონო ტიტული კი 2015 წლის პრემიერ ლიგაა ჩელსისთან. ბენფიკაში მან გასული სეზონი დაუმარცხებლად ჩაამთავრა პორტუგალიის ლიგაში, თუმცა ეს შედეგი მხოლოდ მესამე ადგილისთვის აღმოჩნდა საკმარისი პორტუსა და სპორტინგის შემდეგ. გარდა ამისა, მისი ბენფიკა ჩემპიონთა ლიგიდან სწორედ რეალმა გამოთიშა პლეი-ოფის ეტაპზე.