ეგვიპტის ეროვნული ნაკრების მთავარი მწვრთნელი ჰოსამ ჰასანი თანამდებობიდან ოჯახური სკანდალის გამო გაათავისუფლეს.
გადაწყვეტილება ფეხბურთის ფედერაციამ მას შემდეგ მიიღო, რაც მწვრთნელის ოჯახის წევრებს შორის მომხდარმა ფიზიკურმა დაპირისპირებამ დიდი გამოხმაურება გამოიწვია.
ინციდენტი აგვისტოში, ერთ-ერთ კაფეში მოხდა. გავრცელებული ინფორმაციით, ჰასანის პირველი ქორწინებიდან ოთხი შვილი - სამი ქალიშვილი და ერთი ვაჟი - მის ამჟამინდელ მეუღლეს, დან ადამს დაუპირისპირდა. ქალს თმით ათრევდნენ და ფიზიკურად უსწორდებოდნენ. მწვრთნელი კონფლიქტში ჩარევას შეეცადა, თუმცა გონება დაკარგა.
ადამის ადვოკატმა უარყო გავრცელებული ვერსია, თითქოს ჩხუბის ინიციატორი თავად ქალი იყო. მისი განცხადებით, მომხდარის შემდეგ ადამმა მძიმე ფსიქოლოგიური მდგომარეობა და ნერვული აშლილობა გადაიტანა.
მოგვიანებით კონფლიქტი ჰასანის ძმის, იბრაჰიმის ჩართულობით მოგვარდა და მხარეებმა ურთიერთპრეტენზიებზე უარი თქვეს.
თუმცა სკანდალს მწვრთნელის კარიერაზე სერიოზული გავლენა ჰქონდა. 4 ნოემბერს ეგვიპტის მედიის რეგულირების უმაღლესმა საბჭომ ჰასანს მედიასივრცეში გამოჩენა აუკრძალა, სამი დღის შემდეგ კი ფეხბურთის ფედერაციამ ის თანამდებობიდან გაათავისუფლა. პოსტი დატოვა მისმა ძმამ და ასისტენტმა იბრაჰიმ ჰასანმაც.
აღსანიშნავია, რომ ეს გადაწყვეტილება მწვრთნელთან კონტრაქტის 2030 წლამდე გახანგრძლივებიდან ორ თვეზე ნაკლებ დროში მიიღეს.
ჰასანის მიმართ უკმაყოფილება სპორტული შედეგების გამოც არსებობდა. განსაკუთრებით გააკრიტიკეს ანგოლასთან უგოლო ფრის შემდეგ, როდესაც მოჰამედ სალაჰი 61-ე წუთზე შეცვალა. გავრცელებული ინფორმაციით, მათ შორის ურთიერთობაც დაიძაბა.
ჰასანი ეგვიპტის ნაკრებს 2024 წლის თებერვლიდან ხელმძღვანელობდა. მისი მუშაობის პერიოდში გუნდმა 38 მატჩიდან 21 მოიგო, 10 ფრედ დაასრულა და შვიდჯერ დამარცხდა. მისი ხელმძღვანელობით ეგვიპტემ მსოფლიო ჩემპიონატის მერვედფინალამდე მიაღწია და აფრიკის თასის ნახევარფინალშიც ითამაშა.
ეგვიპტის ნაკრების ახალ მთავარ მწვრთნელად ალი მაჰერი დაინიშნა, რომელმაც სადებიუტო შეხვედრაში მალავის წინააღმდეგ 5:0 გაიმარჯვა.