სიტი კომპანის გვარდიოლას მემკვიდრედ განიხილავს

ვრცელდება ინფორმაცია, რომ მანჩესტერ სიტი თავისი ყოფილი კაპიტნის, ვინსენტ კომპანის დაბრუნებას განიხილავს პეპ გვარდიოლას შემცვლელად.

Sport Bild-ის ცნობით, პრემიერ ლიგის კლუბი კომპანის კვლავ ამ პოზიციის ტოპ კანდიდატად მიიჩნევს, მიუხედავად იმისა, რომ ბაიერნის მწვრთნელმა გასულ ოქტომბერში კონტრაქტი 2029 წლამდე გაახანგრძლივა.

ბაიერნის აღმასრულებელი დირექტორი, იან-კრისტიან დრიზენი დარწმუნებულია, რომ კომპანი სრულად არის ფოკუსირებული მიუნხენში გრძელვადიან მომავალზე:

ჩვენ ახლახან გავუხანგრძლივეთ ვინსენტს კონტრაქტი, ამიტომ ეს კითხვა ჩვენთვის საერთოდ არ არსებობს. დარწმუნებული ვარ, ვინსენტი არაფერს აკეთებს წინასწარი დაფიქრებისა და ყველა შესაძლო სცენარის გათვალისწინების გარეშე. 100 პროცენტით მჯერა, რომ მან ეს კითხვა საკუთარ თავს დაუსვა, სანამ პირობას მოგვცემდა. მისი პასუხი კონტრაქტის გახანგრძლივება იყო, ამიტომ არ აქვს მნიშვნელობა, ვინმე დაუკავშირდება თუ არა მას.

თავად პეპ გვარდიოლამ ცოტა ხნის წინ აღნიშნა, რომ თუ კომპანი მომავალში ახალ გამოწვევას მოისურვებს, მანჩესტერ სიტიში დაბრუნება ერთ-ერთი ვარიანტი იქნება:

ის ძალიან ახალგაზრდაა, მიუნხენში ჯერ მხოლოდ ერთი-ორი წელია, ასე რომ, იქ კიდევ რამდენიმე წელი დარჩება. მაქვს განცდა, რომ ადრე თუ გვიან თუ ის ინგლისში დაბრუნებას გადაწყვეტს, მანჩესტერი მის გულსა და გონებაში იქნება და იმედია, მათი გზები ცხოვრების გარკვეულ ეტაპზე გადაიკვეთება.

კომპანი, რომელიც მანჩესტერ სიტიში 2008-დან 2019 წლამდე თამაშობდა, ბაიერნის მთავარ მწვრთნელად 2024 წლის მაისის ბოლოს დაინიშნა. გვარდიოლა კი, მისი ყოფილი მწვრთნელი სიტიში, პრემიერ ლიგის კლუბს სათავეში 2016 წლიდან უდგას.