მანჩესტერ სიტის ხელმძღვანელმა, ხალდუნ ალ მუბარაკმა, კლუბის შიდა მედიასთან ვრცელ ინტერვიუში სენსაციური დეტალები გაამჟღავნა პეპ გვარდიოლას ათწლიანი მმართველობის შესახებ, რომელიც მიმდინარე სეზონის ბოლოს ოფიციალურად დასრულდა. ალ მუბარაკის თქმით, ესპანელმა სპეციალისტმა კლუბიდან წასვლა, ემოციურ ფონზე, 100-ჯერ მაინც დააპირა, სანამ საბოლოო გადაწყვეტილებას მიიღებდა.
„ბიჭი, რომელიც მგელს უხმობდა“
კლუბის ხელმძღვანელმა გვარდიოლასთან ურთიერთობა ცნობილ იგავთან გააიგივა. მისი თქმით, რთულ პერიოდებში პეპი ხშირად ამბობდა, რომ მიდიოდა, თუმცა ეს გადაწყვეტილებები არასდროს ყოფილა საბოლოო:
რთულ მომენტებში ის წასვლას 100-ჯერ მაინც აანონსებდა. როდესაც პეპი ამბობდა, რომ მიდის, ეს არ ნიშნავდა, რომ ის მართლაც გვტოვებდა. ამას სერიოზულად არ უნდა მიუდგე, მას მართვა სჭირდებოდა. მე მისი ფსიქიატრიც კი ვიყავი, რათა კრიზისულ მომენტებში უკან დამებრუნებინა.
ალ მუბარაკმა აღნიშნა, რომ ყოველთვის ახერხებდა გვარდიოლას გადარწმუნებას, თუმცა ამ სეზონში ორივე მათგანმა იცოდა, რომ დადგა მომენტი, როდესაც ესპანელის გადაწყვეტილება ურყევი და საბოლოო იყო, რის გამოც კლუბის ხელმძღვანელობას მისი შენარჩუნებისთვის აღარ უბრძოლია.
55 წლის გვარდიოლამ მანჩესტერ სიტიში ფენომენალური ეპოქა შექმნა - მან 20 ტიტული მოიგო, მათ შორის პრემიერლიგის 6 თასი და ჩემპიონთა ლიგა. თავისი ბოლო სეზონი კი ინგლისის ვიცე-ჩემპიონობით, ასოციაციის თასითა და ლიგის თასით დახურა.
ალ მუბარაკის განცხადებით, გვარდიოლამ არა მხოლოდ გუნდი, არამედ მთლიანად ინგლისური ფეხბურთის ტაქტიკური ლანდშაფტი შეცვალა და საკუთარი კვალი სამუდამოდ დატოვა. მიუხედავად მისი წასვლისა, კლუბის თავმჯდომარე დარწმუნებულია, რომ სიტის დნმ-ში გამარჯვება დევს და გარდამავალი პერიოდი უმტკივნეულოდ ჩაივლის.
