სევილიაში გიორგი ქოჩორაშვილის სიტუაცია რთულდება - ლა ლიგის ბოლო შეხვედრებში ქართველი ნახევარმცველი სათადარიგოთა სკამს დაეჯაჭვა.
სეზონის სტარტი ნამდვილად დამაიმედებელი იყო: გიორგიმ პირველ 7 მატჩში (აქედან 3 სასტარტოში) ჯამში 273 წუთი ითამაშა. თუმცა, ოქტომბრის დასაწყისში ლევანტესთან (3:3) ჩატარებული მატჩის შემდეგ ვითარება შეიცვალა. მთავარმა მწვრთნელმა, ლუის გარსია პლასამ ბოლო სამ ტურში ქართველი მხოლოდ ერთხელ (ხეტაფესთან მე-80 წუთის შემდეგ) ათამაშა.
სევილიას მხარდამჭერი გვერდი Vamos Mi Sevilla აღნიშნავს, რომ სათამაშო დროის მკვეთრმა კლებამ თავად ფეხბურთელის გარემოცვაში უკმაყოფილება გამოიწვია. რადიოსადგურ Cadena SER-ის ინფორმაციით, გიორგი მიიჩნევს, რომ ძირითადში მეტ როლს იმსახურებს.
მთავარი პრობლემა მისი კონკურენტების, ფრანგი ლეგიონერების, ლუსიენ აგუმესა და იუსუფ ფოფანას ბრწყინვალე ფორმაა, რომლებიც პლასას სისტემის უცვლელ წევრებად იქცნენ. ამ ფონზე, კლუბის ხელმძღვანელობა სიმშვიდეს ინარჩუნებს. სევილიას სპორტულმა დირექტორმა,ხოსე იგნასიო ნავარომ განაცხადა:
ბოლო მატჩებში მას არცთუ ბევრი დრო მიეცა. შემადგენლობის მართვაზე პასუხისმგებელი ლუისია, ქოჩორაშვილის თამაშთან დაკავშირებით კი საგანგაშო ნამდვილად არაფერია
ამჟამად ქოჩორაშვილი საქართველოს ნაკრებში იმყოფება. დისკვალიფიკაციის გამო ის უნგრეთთან 14 ნოემბერს გასამართ მატჩს გამოტოვებს, თუმცა 17 ნოემბერს უკრაინასთან ითამაშებს. რაც შეეხება სევილიას, ანდალუსიელები 12 ტურის შემდეგ 18 ქულით მე-6 ადგილზე არიან და 21 ნოემბერს ბეტისს უმასპინძლებენ.