მანჩესტერ იუნაიტედის ლეგენდამ, პოლ სქოულზმა, არსენალის გულშემატკივრები გააოცა, როდესაც მხარი დაუჭირა მსაჯების გადაწყვეტილებას ვესტ ჰემთან მატჩში გაუქმებული გოლის გამო. ეს ინციდენტი მიმდინარე სეზონის ერთ-ერთ ყველაზე სკანდალურ VAR გადაწყვეტილებად ითვლება.
შეგახსენებთ, რომ კვირას გამართულ შეხვედრაში კალუმ ვილსონმა ბოლო წუთზე გაიტანა გოლი, თუმცა ხანგრძლივი განხილვის შემდეგ ის გაუქმდა, რადგან ჩაითვალა, რომ პაბლომ მეკარე დავიდ რაიაზე თამაშის წესი დაარღვია. ამ გადაწყვეტილებამ ვესტ ჰემი გავარდნის პირას დატოვა, არსენალმა კი მანჩესტერ სიტისთან სხვაობა 5 ქულამდე გაზარდა.
სქოულზმა გადაცემაში The Good, The Bad & The Football განაცხადა, რომ მსაჯმა სწორი გადაწყვეტილება მიიღო. მისი თქმით, ეპიზოდში ორი დარღვევა იკვეთებოდა: ხელის დადება, რაც მეკარეს მოძრაობის საშუალებას არ აძლევდა და მკლავზე მოქაჩვა. მან ასევე უარყო ბრალდებები იმის შესახებ, რომ არსენალი მთელი სეზონის განმავლობაში მსგავსი მეთოდებით თამაშობდა და აღნიშნა, რომ ლონდონელები ამას წესების ფარგლებში აკეთებდნენ.
სქოულზის ყოფილმა თანაგუნდელმა, ნიკი ბატმა, დაამატა, რომ მიუხედავად იმისა, რომ VAR-ს ვერ იტანს, ამ შემთხვევაში ჯარიმა აშკარა იყო და ამაზე დავა არც ღირს.
არსენალის ფანებში ამ განცხადებამ გაოცება გამოიწვია. ზოგიერთი მათგანი ხუმრობდა, რომ სქოულზს ჯანმრთელობის შემოწმება სჭირდება, რადგან ის მიუკერძოებელ სიმართლეს ამბობდა, სხვები კი ეჭვობდნენ, რომ ეს ხელოვნური ინტელექტის მიერ გენერირებული ვიდეო იყო, რადგან არ სჯეროდათ, რომ იუნაიტედის ლეგენდა მათ დაიცავდა.
