ოთარ თანზილოვმა UFC Fight Night-ზე შთამბეჭდავი გამარჯვება მოიპოვა.
ქართველმა მებრძოლმა ლას ვეგასში მალკოლმ უელმეიკერი თავში ფეხის დარტყმით ნოკაუტში ჩააგდო და UFC-ში პირველი გამარჯვება იზეიმა.
სწორედ ასეთი შთაბეჭდილების მოხდენა სურდა თანზილოვს (11-2 MMA, 1-1 UFC) რამდენიმე თვის წინ, როდესაც ორგანიზაციაში დებიუტი ჰქონდა, თუმცა საბოლოო შედეგის გათვალისწინებით, დაგვიანებული წარმატებითაც კმაყოფილია.
ბრძოლის დასრულების შემდეგ თანზილოვი მედიის წარმომადგენლებს ესაუბრა.
„ძალიან კარგად ვიყავი მომზადებული ყველაფრისთვის, რასაც მეტოქე შემომთავაზებდა. უნდა დავაფასო ისიც, რომ რამდენჯერმე კარგად მომარტყა.
პირველ რაუნდში რამდენიმე ძლიერი დარტყმა მივიღე და მისი ძალა ვიგრძენი. ძალიან ძლიერად ურტყამს, თუმცა ამ ყველაფერს გავუძელი.
მოვახერხე მისი სტილის გაშიფვრა და დისტანციის სწორად განსაზღვრა. როგორც კი მისი დისტანცია დავარღვიე და შეტევაზე გადავედი, დავინახე, რომ საპასუხოდ ვეღარაფერს მთავაზობდა. სწორედ ამიტომ შევძელი მისი ნოკაუტში ჩაგდება.
ბრძოლის განმავლობაში თავს შესანიშნავად ვგრძნობდი. ეს ყველაფერი ჩემი მწვრთნელების, მათეოსის, არტემისა და ლევანის დამსახურებაა. ერთად ძალიან ბევრი ვიმუშავეთ და მეტოქის კარგად შესწავლას დიდი დრო დავუთმეთ.
ბრძოლისთვის მზად ვიყავი და თავს კარგად ვგრძნობდი. ვიცი, რომ პირველი რაუნდი ორმხრივი შეტევებით მიმდინარეობდა, მაგრამ მეორე რაუნდში უკვე დარწმუნებული ვიყავი, რომ თუ ზუსტად მოვარტყამდი, მეტოქე ძირს დაეცემოდა“, - განაცხადა თანზილოვმა.
28 წლის ქართველმა მებრძოლმა UFC-ში დებიუტი ივნისში გამართა, როდესაც შეინ კოლინსთან მსაჯების ერთსულოვანი გადაწყვეტილებით დამარცხდა.
ის შეხვედრა არცერთი მებრძოლის მხრიდან განსაკუთრებული სანახაობით არ გამოირჩეოდა.
შესაძლოა, სწორედ ამან განაპირობა ის ფაქტი, რომ ბოლო დაპირისპირებაშიც თანზილოვი აუტსაიდერად მიიჩნეოდა.
თუმცა ქართველი მებრძოლი ბედნიერია, რომ გულშემატკივრებს საკუთარი შესაძლებლობების რეალური დონე აჩვენა.
„ბევრი ადამიანი არ მიცნობდა. მათ არ იცოდნენ ჩემი სტილი და ის, თუ რისი გაკეთება შემიძლია ოქტაგონზე. თუმცა ადამიანებმა, რომლებიც მიცნობენ და ჩემთან ერთად მუშაობენ, ძალიან კარგად იციან ჩემი შესაძლებლობები.
მცირე ტრავმები მაწუხებდა. მუხლები მტკიოდა და ოპერაციაც გავიკეთე. ახლა ეს პრობლემები აღარ მაქვს.
მინდა ყველა გულშემატკივარს ვუთხრა: მე დავბრუნდი! აქ ვარ და ძალიან სანახაობრივ ბრძოლებს გაჩვენებთ. უბრალოდ მიყურეთ!
ადრე ბრძოლებში ჭიდაობასა და პარტერში მუშაობას იმიტომ ვანიჭებდი უპირატესობას, რომ მუხლები მტკიოდა. ახლა ტკივილი აღარ მაწუხებს და ყველას დავუმტკიცებ, რომ ნებისმიერი მეტოქის დასრულება შემიძლია, ვისაც ჩემ წინააღმდეგ დააყენებენ“, - აღნიშნა ქართველმა მებრძოლმა.
რაც შეეხება სამომავლო გეგმებს, თანზილოვისთვის მნიშვნელობა არ აქვს, ვის დაუპირისპირდება ან როდის გამართავს მომდევნო ბრძოლას.
გადაწყვეტილება UFC-ზეა დამოკიდებული, თუმცა ქართველი მებრძოლი მზადყოფნას გამოთქვამს, რომ ოქტაგონზე უმოკლეს დროში დაბრუნდეს.
„თუ საჭირო იქნება, მზად ვარ მომდევნო თვეშიც ვიბრძოლო“, – განაცხადა თანზილოვმა.
VIDEO: თანზილოვის საოცარი ნოკაუტი და ქართველის საღამოს პერფორმანსი
