Ted Lasso-ს ვარსკვლავი კრისტო ფერნანდესი პროფესიონალი ფეხბურთელი გახდა.
ამერიკული კლუბის განცხადებით, მან USL Championship-ის გუნდ ელ პასო ლოკომოტივთან გააფორმა კონტრაქტი.
ფერნანდესი, რომელმაც სერიალში გამოგონილი ფეხბურთელი დანი როხასი განასახიერა, ახლა უკვე რეალურ გუნდში ითამაშებს მას შემდეგ, რაც ელ პასოში ორთვიანი საცდელი პერიოდი გაიარა.
როგორც Ted Lasso-ში მისი პერსონაჟი, ფერნანდესიც თავდამსხმელია.
„კრისტო ჩვენი შემადგენლობის შესანიშნავი დამატებაა და შეტევაში კიდევ ერთ საფრთხეს გვაძლევს,“ - განაცხადა ლოკომოტივის მთავარმა მწვრთნელმა ჯუნიორ გონსალესმა.
მისი ფეხბურთისადმი სიყვარული და ლიდერული თვისებები გასახდელში დაგვეხმარება იმ პოზიტიური კულტურის კიდევ უფრო გაძლიერებაში, რომლის შექმნასაც კლუბში ვცდილობთ.
ფერნანდესმა თქვა:
ფეხბურთი ყოველთვის ჩემი ცხოვრების და იდენტობის დიდი ნაწილი იყო და სადაც არ უნდა წავეყვანე ცხოვრებას, პროფესიონალურად თამაშის ოცნება გულიდან არასოდეს გამქრალა.
უზომოდ მადლობელი ვარ ელ პასო ლოკომოტივის - კლუბის, მწვრთნელების, პერსონალის და განსაკუთრებით ჩემი თანაგუნდელების, რომ კარი გამიღეს და პირველივე დღიდან მომცეს კონკურენტულ გარემოში თამაშის შესაძლებლობა.“
მსახიობობამდე ფერნანდესი ახალგაზრდულ დონეზე მექსიკურ კლუბ ტეკოსში თამაშობდა, თუმცა 15 წლის ასაკში ტრავმის გამო ფეხბურთს ჩამოშორდა.
ახლა კი ელ პასოში ის შეეცდება დამატებითი ბიძგი მისცეს გუნდს, რომელიც დასავლეთ კონფერენციაში მე-4 ადგილზე იმყოფება - 4 მოგებით, 2 ფრითა და 3 მარცხით.
