ტიბო კურტუას ისტორიული რეკორდები
მანჩესტერ სიტისთან მოპოვებულმა ბრწყინვალე გამარჯვებამ რეალ მადრიდის ბელგიელ გოლკიპერს, ტიბო კურტუას, კარიერაში ახალი ფურცელი გადააშლევინა. ჩემპიონთა ლიგის მერვედფინალში კურტუა ყურადღების ცენტრში არა მხოლოდ მოგერიებული ბურთებით, არამედ შემტევი პოტენციალითაც მოექცა.
მიუხედავად იმისა, რომ საღამოს მთავარი გმირი ფედე ვალვერდე და მისი ჰეთ-თრიკი იყო, ყველაფერი სწორედ კურტუას 60-მეტრიანი პასით დაიწყო. მე-20 წუთზე შესრულებული ეს დიდებული გადაცემა, რომელმაც სიტის დაცვა დააბნია, კურტუასთვის მიმდინარე სეზონში ჩემპიონთა ლიგაზე უკვე მეორე საგოლე ასისტი აღმოჩნდა.
პირველი საგოლე გადაცემა ბელგიელმა 2025 წლის სექტემბერში, ყაირათთან მატჩში მიითვალა, როდესაც მისი შორეული პასი კილიან მბაპემ გოლად აქცია. ამ შედეგით კურტუამ ხოსე ფრანსისკო მოლინას 2003/04 წლების სეზონის რეკორდი გაიმეორა. თუმცა, ცნობილი სტატისტიკოსი MisterChip მიიჩნევს, რომ კურტუა ერთადერთი მეკარეა ამ მიღწევით, რადგან მოლინას ერთ-ერთი ასისტი სადავოა.
გარდა ამისა, Opta-ს მონაცემებით, კურტუამ კარიერაში ჩემპიონთა ლიგაზე ჯამში უკვე 3 საგოლე გადაცემა დააგროვა (ჩელსისა და რეალ მადრიდში თამაშისას), რაც მეკარეებს შორის აბსოლუტური რეკორდია.
მეკარეებისგან მსგავსი რეკორდი ისედაც იშვიათობაა, ჩემპიონთა ლიგის მსგავს ტურნირზე კი ტიბოს ეს მიღწევა ნამდვილ ისტორიულ მოვლენად იქცა. სანამ 17 მარტს ეტიჰადზე საპასუხო მატჩი გაიმართება, მადრიდელები შაბათს, ლა ლიგაში ელჩეს უმასპინძლებენ.
