ესპანური MARCA ილია თოფურიასა და მის ყოფილ მეუღლეს შორის სასამართლო დავასთან დაკავშირებით სტატიას აქვეყნებს.
"პირადი საკითხის გამო ოქტაგონიდან დროებით შორს მყოფმა ილია თოფურიამ ყოფილი მეუღლის, ჯორჯინა უსკატეგისთან, რთული განქორწინების პროცესის ფარგლებში, სასამართლოში მისთვის სასარგებლო გადაწყვეტილება მიიღო.
როგორც MARCA ადასტურებს, მოსტოლესის ქალთა მიმართ ძალადობის საქმეთა სასამართლოში გამართულ სხდომაზე, თოფურიას ყოფილი მეუღლის ყველა მოთხოვნა უარყოფილ იქნა.
სხდომა ეხებოდა „ოჯახურ და ადმინისტრაციულ საკითხს, რომელიც დაკავშირებულია ‘ელ მატადორის’ ქალიშვილის მიერ ესპანეთის ფარგლებს გარეთ განხორციელებულ მოგზაურობასთან“.
ამ ეტაპზე, მოსამართლის გადაწყვეტილებით, ყოფილი მეუღლე ვერ შეძლებს მათი წლინახევრის ასაკის ქალიშვილის ქვეყნის ფარგლებს გარეთ გაყვანას, ვიდრე განქორწინების საბოლოო დადგენილება და თოფურიასთვის ვიზიტების გრაფიკი არ განისაზღვრება.
მებრძოლი, რომელსაც ოთხი თვის განმავლობაში, არაერთი მცდელობის მიუხედავად, არ ჰქონდა შესაძლებლობა ენახა თავისი ქალიშვილი, სასამართლოდან შვებით გამოვიდა, რადგან სასამართლოს განჩინებაში პირდაპირ არის აღნიშნული, რომ სწორედ დედის ერთპიროვნული გადაწყვეტილება იყო მამის, ილია თოფურიას, ქალიშვილთან კონტაქტის შეზღუდვა.
მისმა ყოფილმა პარტნიორმა ესპანეთიდან წასვლა სოციალური ქსელებში მასზე განხორციელებული შევიწროებით გაამართლა, თუმცა მაგისტრატმა ეს არგუმენტი არ მიიღო და აღნიშნა, რომ ქვეყნიდან გასვლის ბილეთები შეძენილი იყო იმ განცხადებამდე 12 დღით ადრე, რომელიც ილია თოფურიამ გაავრცელა და რომელმაც მთელი აჟიოტაჟი გამოიწვია.
თავის მხრივ, თოფურია კვლავ ელოდება პირადი მდგომარეობის საბოლოო მოგვარებას, სანამ UFC-ში დაბრუნდება.
ამჟამად მის წინააღმდეგ ოჯახში ძალადობის ბრალდებით სარჩელია შეტანილი განქორწინების პროცესის ფონზე, თუმცა იგი ჯერ არ დაუბარებიათ ჩვენების მისაცემად და არც რაიმე სამართლებრივი ქმედება განხორციელებულა.
მოსალოდნელია, რომ თუ ყველაფერი გეგმის მიხედვით წარიმართება, თოფურია UFC-ის მსუბუქი წონის ტიტულს კვლავ არ დაიცავს 2026 წლის გვიან გაზაფხულამდე ან ზაფხულამდე.
სავარაუდოდ, ის ჯასტინ გეიჯისა და პედი პიმბლეტის ბრძოლის გამარჯვებულს შეხვდება, რომელიც იანვრის ბოლოს გაიმართება და სადაც ისინი დროებითი ტიტულისთვის იბრძოლებენ." - წერია ესპანური გამოცემის სტატიაში.
