ტოტენჰემი: "თამაშის კრიტიკა ფეხბურთის ნაწილია, რასიზმი კი - არა"

ტოტენჰემმა მკაცრად დაგმო რასიზმი, რომელიც მცველ კევინ დანსოს წინააღმდეგ იყო მიმართული შაბათს, ბრაიტონთან ფრედ (2:2) დასრულებული მატჩის შემდეგ.

შეურაცხყოფა მას შემდეგ დაიწყო, რაც დანსოს ქმედება ჟორჟინიო რუტერის მიერ გატანილ გამათანაბრებელ გოლს დაუკავშირეს. ამ შედეგის შემდეგ სპურსი პრემიერ ლიგის გასავარდნ ზონაში რჩება.

კლუბმა დაადასტურა, რომ სოციალური მედიის საშუალებით გავრცელებული რასისტული შეურაცხყოფის შესახებ პოლიციას უკვე აცნობა. განცხადებაში ტოტენჰემმა აღნიშნა, რომ ინციდენტები პრემიერ ლიგის კამპანიის „No Room For Racism“ (რასიზმის ადგილი არ არის) ფარგლებში გამართულ უქმეებზე მოხდა.

„ბრაიტონთან გუშინდელი შეხვედრის შემდეგ... კევინ დანსო სოციალურ ქსელებში მუდმივად ხდება ამაზრზენი რასისტული თავდასხმების ობიექტი“, — აცხადებს კლუბი. მათ მსგავსი ქცევა „ეჭვგარეშე სისხლის სამართლის დანაშაულად“ შეაფასეს და აღნიშნეს, რომ ამას არ მოითმენენ.

ტოტენჰემი სასწრაფო ზომებს იღებს და იდენტიფიცირებული კონტენტის შესახებ ინფორმაციას აწვდის როგორც მეტროპოლიტენის პოლიციას, ისე იმ ქვეყნების შესაბამის ორგანოებს, სადაც დამნაშავეები ცხოვრობენ. კლუბი პირობას დებს, რომ ყველა იდენტიფიცირებული პირის წინააღმდეგ მაქსიმალურად მკაცრი ზომების გამოყენებას მოითხოვს.

მათ ასევე სრული და უპირობო მხარდაჭერა გამოუცხადეს დანსოს და დასძინეს:

ამ კლუბში მსგავსი გამოწვევის წინაშე არავინ დარჩება მარტო. გუნდის ფორმა ან სატურნირო ცხრილში დაკავებული ადგილი ვერასდროს იქნება რასისტული შეურაცხყოფის გამართლება. მოედანზე ნაჩვენებ თამაშსა და ფეხბურთელის დისკრიმინაციას შორის არანაირი კავშირი არ არსებობს. თამაშის კრიტიკა ფეხბურთის ნაწილია, რასიზმი კი არა.