რატომ ვერ აჩერებს არსენალი სიტის? საჩემპიონო რბოლის კულმინაცია

პეპ გვარდიოლას ჩვევად აქვს, ნებისმიერ მატჩს ფინალი უწოდოს.

მისი აზრით, თამაშს, რომელიც ტიტულის ბედს წყვეტს, ერთ-ერთი მონაწილისთვის საბოლოო განაჩენის ძალა აქვს. „თუ წავაგებთ, ყველაფერი დასრულებულია“, - განაცხადა მან, თუმცა ბევრს მიაჩნდა, რომ საჩემპიონო ბრძოლა დიდი ხნის წინ დასრულდა.

სულ რაღაც ერთი კვირის წინ არსენალის უპირატესობა 9 ქულას შეადგენდა, ოთხშაბათ საღამოსთვის კი ეს სხვაობა შესაძლოა საერთოდ გაქრეს. მანჩესტერ სიტი ის მდევარი აღმოჩნდა, რომლის ჩამოცილებაც არსენალმა ვერ შეძლო. გვარდიოლას ადრეც არაერთხელ გამოუჭერია კონკურენტები ფინიშის ხაზზე და ამის შანსს ახლაც ხედავს:

თვეების წინ, როცა ქულები იქ დავკარგეთ, სადაც არ ველოდით, კალენდარს გადავხედე და ვთქვი: როცა არსენალი შინ გვესტუმრება, ეს იქნება ჩვენი შანსი, თუ მანამდე სხვაობა 20 ქულა არ იქნება. 6 ქულა მცირე მანძილი არ არის, მაგრამ მისი აღმოფხვრის შანსი გვაქვს

მომენტი და ფორმა

ფორმის მხრივ არსენალი პრემიერ ლიგაში უკეთ გამოიყურება: ბოლო ხუთ მატჩში ოთხი მოგება, სიტის კი სამ შეხვედრაში მხოლოდ ერთი გამარჯვება აქვს. თუმცა, თუ ყველა ტურნირს ავიღებთ, ბოლო სამ მატჩში სიტიმ არსენალი, ლივერპული და ჩელსი ჯამური ანგარიშით 9:0 გაანადგურა. არსენალს კი ხუთ მატჩში მხოლოდ ერთი მოგება და სამი გოლი აქვს. იქმნება შთაბეჭდილება, რომ სიტი პიკს სწორედ გადამწყვეტ მომენტში აღწევს.

გვარდიოლა და მიკელ არტეტა ორივე უკიდურესად ინტენსიური პიროვნებაა, თუმცა გამოცდილი მწვრთნელი ახლა უფრო მშვიდად ჩანს. ნაწილობრივ ეს მისი წარსული მიღწევების დამსახურებაა. პრემიერ ლიგის მეშვიდე ტიტული მისი უდიდესი მიღწევა მაინც არ იქნება: „არა, უდიდესი რამ უკვე გაკეთებულია“, - ამბობს კაცი, რომლის ტიტულების კოლექციაშიც ამ სტატუსისთვის დიდი კონკურენციაა.

არტეტასთვის კი, თუ ის არსენალს 2004 წლის შემდეგ პირველად გახდის ჩემპიონს, ეს კარიერის მწვერვალი იქნება. გვარდიოლას სჯერა, რომ ეს ხანგრძლივი მოლოდინი არსენალის უპირატესობაა:

ჩვენ ვერ შევებრძოლებით ამ 22 უტიტულო წელს, მათ აქვთ რაღაც უნიკალური - წყურვილი

წნეხი და ტაქტიკური თამაშები

თუმცა, ეს მოლოდინი არსენალზე დამატებით წნეხსაც წარმოშობს. სიტი ბოლო დროს ამ წნეხს უფრო მარტივად უმკლავდება. შესაძლოა, გვარდიოლამ გუნდს სწორი მენტალიტეტი ჩამოუყალიბა - მათ გამოიყენეს ყველა შანსი: არსენალთან, ჩელსისთან და ლივერპულთან პირველ ტაიმებში გოლი არ გაუტანიათ, თუმცა საბოლოოდ დაჯერებული გამარჯვებები მოიპოვეს.

გვარდიოლამ არტეტას კარაბაოს თასის ფინალშიც აჯობა, სადაც გადამწყვეტი როლი ნიკო ო’რაილიმ ითამაშა. მიუხედავად იმისა, რომ ახალგაზრდა ფეხბურთელმა ჩელსისთან ტრავმა მიიღო, არსენალისთვის ცუდი ამბავი ისაა, რომ ის მწყობრშია და მათ წინააღმდეგ სათამაშოდ მზადაა.

თუკი არსენალს ზედმეტ პროგნოზირებადობაში ადანაშაულებენ, გვარდიოლა თავისი ყოფილი ასისტენტისგან სიურპრიზებს ელის:

მიკელს ცოტათი ვიცნობ, ის აუცილებლად შეცვლის რაღაცას და ჩვენ მზად უნდა ვიყოთ

სტატისტიკა და მომავალი

საინტერესოა, რომ გვარდიოლას ექვსი საჩემპიონო სეზონი სიტიში ქულების ფანტასტიკური მაჩვენებლით სრულდებოდა: 100, 98, 86, 93, 89 და 91. წელს კი, დარჩენილი შვიდივე მატჩიც რომ მოიგონ, მაქსიმუმ 85 ქულას დააგროვებენ.

წელს ქულების რაოდენობა გაცილებით დაბალია, ვიდრე იურგენ კლოპის ლივერპულთან კონკურენციის დროს. შესაძლოა იმიტომ, რომ ჩვენ არ ვართ ისეთი კარგები, ან სხვა კონკურენტები გახდნენ უკეთესები

გვარდიოლა ხედავს, რომ არსენალის დამარცხების შემთხვევაშიც კი, ქულების დაკარგვის საფრთხე რჩება: „ჩვენი კალენდარი საშინელია“. თუმცა, ამ გზის ბოლოს მას პრემიერ ლიგის მეშვიდე და შესაძლოა, ბოლო ტიტულის მოგების შანსი ელის.