ევერტონი ლივერპულის წინააღმდეგ: არის ეს ბოლო წლების ყველაზე დიდი მერსისაიდული დერბი?
ბოლო სეზონებში ევერტონსა და ლივერპულს, გეოგრაფიული სიახლოვის გარდა, საერთო ბევრი არაფერი ჰქონიათ. სანამ ლივერპული ჩემპიონთა ლიგის თასსა და პრემიერ ლიგის ორ ტიტულს იგებდა, ევერტონი მთელ ამ დროს გადარჩენისთვის ბრძოლაში ატარებდა.
ევერტონს ხშირად სასწაული სეზონის ბოლო მატჩებში სჭირდებოდათ პრემიერ ლიგაში ადგილის შესანარჩუნებლად: დომინიკ კალვერტ-ლუინის თავურით კრისტალ პალასთან 2022 წელს, თუ აბდულაი დუკურეს გადამწყვეტი გოლით ბორნმუთის წინააღმდეგ ერთი წლის შემდეგ.
ბოლო ექვსი სეზონის განმავლობაში ევერტონმა ცხრილის ზედა ნაწილში მოხვედრა მხოლოდ ერთხელ მოახერხა, 2020/21 წლების სეზონში, კარლო ანჩელოტის ხელმძღვანელობით მე-10 ადგილი დაიკავა. არასწორმა მენეჯმენტმა ფინანსური პრობლემები და დაღმასვლა გამოიწვია, თუმცა ლურჯები კვლავ მაღლა იწევენ. შესაძლოა, დევიდ მოიესი ყველა გულშემატკივრის რჩეული არ იყოს, მაგრამ მისმა „უსაფრთხოება უპირველეს ყოვლისა'' მიდგომამ გუნდს გაუმჯობესება მოუტანა.
ევროპული ოცნების დაბრუნება
ისტორიულ, პირველ მერსისაიდულ დერბის Hill Dickinson Stadium-ზე ევერტონი ევროთასების იმედით ხვდება. მართალია, გუნდი მე-10 ადგილამდე ჩამოქვეითდა, მაგრამ შაბათის შედეგები მათთვის მაინც დადებითი გამოდგა. ჩელსიმ, ბრენტფორდმა და ბრაიტონმა ქულები დაკარგეს. დღევანდელი გამარჯვება ევერტონს მე-6 ადგილზე აიყვანს, ჩემპიონთა ლიგის ზონამდე კი მხოლოდ 2 ქულა დააშორებს.
ევერტონმა ლივერპულთან ბოლო რვა შეხვედრიდან მხოლოდ ერთი მოიგო, თუმცა ლურჯები ახლა სისხლის სუნს გრძნობენ. მოქმედი ჩემპიონები მეზობლების ახალ, სანაპიროზე მდებარე სახლს კატასტროფულ ფორმაში სტუმრობენ. არნე სლოტის გუნდმა ბოლო ხუთი მატჩიდან ოთხი წააგო, გამოვარდა ჩემპიონთა ლიგიდან და ასოციაციის თასიდან. ცხრილში მეხუთე ადგილზე მყოფთათვის ტიტულის დაცვაზე საუბარი დიდი ხანია დასრულდა, ახლა მათი მთავარი საზრუნავი ჩემპიონთა ლიგის საგზურის შენარჩუნებაა.
ისტორიული პარალელი
ორ ათწლეულზე მეტი გავიდა მას შემდეგ, რაც ევერტონი და ლივერპული პრემიერ ლიგაში ერთმანეთს იდენტური მიზნით ბოლოჯერ შეხვდნენ.
2004/05 წლების სეზონში ევერტონმა ლივერპულს აჯობა, მეოთხე ადგილი დაიკავა და მეზობელი ჩემპიონთა ლიგის მიღმა დატოვა. მხოლოდ ბედის ირონიით მოხდა, რომ ლივერპული მომდევნო სეზონში მაინც დაუშვეს ტურნირზე, სტამბოლში მოპოვებული ისტორიული გამარჯვების გამო წესები შეიცვალა და რაფაელ ბენიტესის გუნდს, როგორც ტიტულის მფლობელს, ასპარეზობის უფლება მისცეს. ევერტონი კი მესამე საკვალიფიკაციო ეტაპზე ვილიარეალთან დამარცხდა, რაც გულშემატკივარს დღემდე მწარედ ახსოვს.
ევროპული რბოლა ახლა რევანშის შანსს იძლევა. მე-6-დან მე-12 ადგილამდე გუნდებს შორის სხვაობა მხოლოდ 3 ქულაა, ლივერპული კი ამ ჯგუფის თავზეა. თითოეულ ქულას გადამწყვეტი მნიშვნელობა აქვს, ევერტონის მოგება კი სტუმრების უპირატესობას მინიმუმამდე შეამცირებს.
Bramley-Moore Dock-ზე ნამდვილი ჯოჯოხეთური ატმოსფერო იგეგმება. ლივერპულს ძალიან არასტუმართმოყვარე დახვედრა ელის. მოიესისა და მისი გუნდისთვის, ისევე როგორც მრავალტანჯული გულშემატკივრისთვის, ეს უდიდესი შესაძლებლობაა.
