რუმინეთში ტრაგედია მოხდა.
მიკროავტობუსი, რომლითაც ბერძნული პაოკის გულშემატკივრები მგზავრობდნენ, გზაზე გასწრების მცდელობისას შემხვედრ სატვირთო ავტომობილს შეეჯახა.
შედეგად შვიდი ადამიანი დაიღუპა, კიდევ სამი კი დაშავდა და მათი მდგომარეობა კრიტიკულია. დაღუპულები და დაშავებულები საფრანგეთში, ლიონსა და პაოკს შორის გასამართი ევროპის ლიგის მატჩისთვის მიემგზავრებოდნენ.
"დრო ჩერდება. იყინება. სიტყვები ილევა. ტკივილი სხეულსა და გონებაში ერთდროულად აღწევს. ცრემლები თვალებიდან მოედინება. მწუხარება მთლიანად გეუფლება, მუხლებზე გაყენებს და გამსხვრევს.
კიდევ ერთი შავი დღე. კიდევ ერთი აღუწერელი ტრაგედია პაოკის ოჯახისთვის.
ვუსამძიმრებთ ამ ბავშვების ოჯახებს. ამ აუტანელ ტკივილში ისინი მარტო არ იქნებიან. პაოკის დიდი ოჯახი ყოველთვის მათ გვერდით იდგება, რათა შეძლებისდაგვარად შეუმსუბუქოს ეს ტკივილი.
ჩვენი ფიქრები დაშავებულებთანაცაა, რომლებიც საკუთარ ბრძოლას გადიან.
ყველაფერს გავაკეთებთ, რათა მათ საუკეთესო სამედიცინო დახმარება მიიღონ, ვიზრუნებთ, რომ რაც შეიძლება მალე დაბრუნდნენ სახლში და ყოველთვის მათ გვერდით ვიქნებით.
ერთი სურვილი მხოლოდ… აღარასდროს…" - წერია ბერძნული კლუბის განცხადებაში.
"ლიონის ოლიმპიკი გულწრფელ სამძიმარს უცხადებს პაოკს სამშაბათს მომხდარი საგზაო შემთხვევის შედეგად მისი რამდენიმე გულშემატკივრის ტრაგიკული დაღუპვის გამო.
ჩვენი ფიქრები ასევე დაშავებულებთანაა, რომლებიც ამჟამად სიცოცხლისთვის იბრძვიან. 29 იანვარს, გრუპამა სტადიონზე, ლიონი - პაოკის მატჩის დროს გარდაცვლილებს პატივს მივაგებთ." - ვკითხულობთ ფრანგული კლუბის განცხადებაში.
