ტრავმების კოშმარი ტოტენჰემში

ვულვზთან მოპოვებული უმნიშვნელოვანესი გამარჯვება ტოტენჰემისთვის ორმაგი დანაკარგით დასრულდა.

გუნდის მთავარმა მწვრთნელმა, რობერტო დე ძერბიმ, ჩავი სიმონსისა და დომინიკ სოლანკეს მდგომარეობის შესახებ ისაუბრა. ისინი ამჟამად პრემიერ ლიგაში მე-18 ადგილზე არიან და გადარჩენისთვის იბრძვიან, ამიტომ წამყვანი მოთამაშეების დაკარგვა მათთვის მძიმე დარტყმაა.

ყველაზე შემაშფოთებელი ჩავი სიმონსის მდგომარეობაა, რომელიც მოედნიდან 63-ე წუთზე საკაცით გაიყვანეს. ნახევარმცველმა მუხლის ტრავმა მიიღო. დე ძერბის თქმით:

ეს მუხლის პრობლემაა. უახლოეს დღეებში ყველაფერს ვნახავთ. მინდა ჩავიზე მეტი ვიცოდე, რადგან ეს მუხლია. მას ტკივილი ჰქონდა, თუმცა ახლა ველაპარაკე და თავს იმაზე უკეთ გრძნობს, ვიდრე უშუალოდ ტრავმის მომენტში

რაც შეეხება დომინიკ სოლანკეს, მან მოედანი პირველივე ტაიმში კუნთის დაზიანების გამო დატოვა. მწვრთნელმა აღნიშნა, რომ ეს არ არის ისეთივე სერიოზული პრობლემა, როგორიც ფორვარდს აქამდე ჰქონდა, თუმცა დაბრუნების ზუსტი თარიღი უცნობია:

სოლანკეს კუნთის ტრავმა აქვს. არ ვიცი, რამდენი მატჩის გამოტოვება მოუწევს

ტოტენჰემს სეზონის ბოლომდე ოთხი ფინალი ელის ასტონ ვილას, ლიდსის, ჩელსისა და ევერტონის წინააღმდეგ. სამედიცინო შემოწმების პასუხებზე ბევრად არის დამოკიდებული, შეძლებს თუ არა გუნდი პრემიერ ლიგაში ადგილის შენარჩუნებას.