Adidas და ლივერპული წარსულში ბრუნდებიან და კლუბის ისტორიაში ერთ-ერთ ყველაზე გამორჩეულ ფორმას აცოცხლებენ. Bringback კოლექცია ლეგენდარული 1995/96 წლების სეზონის საგარეო ფორმისა და სავარჯიშო ეკიპირების ზუსტი რეპლიკაა.
გერმანულმა ბრენდმა არქივებში ქექვისა და ნოსტალგიური დიზაინების გათანამედროვეობის ხელოვნება სრულყოფილებამდე მიიყვანა. როგორც კი ცნობილი გახდა, რომ სამზოლიანი ბრენდი მერსისაიდის წითელ მხარეს ბრუნდებოდა, ფანებმა მაშინვე დაიწყეს იმ ფორმებზე ფიქრი, რომელთა ხელახლახილვაც სურდათ. სიის სათავეში სწორედ 1995 წლის საგარეო ნაკრები იყო. თავისი თამამი EQT სტილითა და დაუვიწყარი ფერებით, ეს დიზაინი ბოლო წლებში New Balance-მა და Nike-მაც გამოიყენეს, თუმცა ნამდვილ რეტრო-გამოცემას არაფერი შეედრება. Adidas-მა მაქსიმალური სიზუსტით აღადგინა ორიგინალი, რომელიც მთელი კოლექციის მთავარი მშვენებაა.
თუმცა, მხოლოდ სათამაშო მაისურით ყველაფერი არ სრულდება. კოლექცია მოიცავს იმ ეპოქისთვის დამახასიათებელ სრულ სავარჯიშო ხაზს: შორტები, სვიტერი, სავარჯიშო ზედა და შარვალი, ყველაფერი Adidas-ისა და ლივერპულის 90-იანი წლების საფირმო მწვანე, შავი და თეთრი ფერების კომბინაციაშია გადაწყვეტილი. ეს არის ნამდვილი რეტრო-ესთეტიკა, რომელიც პირდაპირ 90-იანი წლების ტრიბუნებიდან გადმოტანილს ჰგავს.
დიზაინის მთავარი ღირებულება ავთენტურობაა. დეტალები ხელუხლებელია: მკერდზე ლივერპულის კლასიკური ემბლემაა, ცენტრში კი იმ ეპოქის სიმბოლო, სპონსორი Carlsberg, ხოლო EQT-ის მასიური ლოგოები იმ პერიოდის საფეხბურთო მოდას კიდევ ერთხელ უსვამს ხაზს.
ნოსტალგიურ ფერებთან ერთად, კოლექციაში თანამედროვე შტრიხებიც გამოჩნდა. კლასიკური მაისურის Black-out ვერსია სრულიად შავ ფერებშია გადაწყვეტილი, სადაც ემბლემა და სპონსორიც კი მუქ ტონებშია ჩამჯდარი. შედეგად მივიღეთ დახვეწილი, მოდური ინტერპრეტაცია, რომელიც წარსულსა და დღევანდელობას ერთმანეთთან აკავშირებს.
ასეთი კოლექციის წარდგენას კი შესაბამისი სახეები სჭირდებოდა. კამპანიაში ლივერპულის ლეგენდარული თავდამსხმელი, რობი ფაულერი და მისი განუყრელი მეწყვილე, სტივ მაკმანამანი მონაწილეობენ, ორი ფეხბურთელი, რომლებიც ზუსტად იმ ეპოქას განასახიერებენ. სარეკლამო რგოლი რეტრო სტილის სპორტულ მაღაზიაშია გადაღებული, სადაც ვეტერანები გუნდის ახლანდელ წევრებს მასპინძლობენ, რაც თაობების სიმბოლურ შეხვედრას ჰგავს.
