ახმედ გაჯიმაგომედოვმა სოციალურ ქსელში ოფიციალური განცხადება გაავრცელა, სადაც მერაბ დვალიშვილთან საქართველოში მომხდარ კონფლიქტზე და აბუ-დაბიში უსმან ნურმაგომედოვის მონაწილეობით განვითარებულ მოვლენებზე ისაუბრა. მისი თქმით, ინტერნეტში უამრავი ცრუ ინფორმაცია ვრცელდება და დროა, სიმართლეს ნათელი მოეფინოს.
რუსი მებრძოლის განცხადებით, საქართველოში პრესკონფერენციისას ის მერაბთან სასაუბროდ მივიდა და სიტყვით "ძმაო" მიმართა, თუმცა, მისი მტკიცებით, ქართველმა მებრძოლმა დაარტყა და დედის მისამართით შეურაცხმყოფელი სიტყვები გამოიყენა.
ამ სიტყვებისთვის მას ბოდიში არ მოუხდია, მსგავს რამეს კი არავის ვპატიობ
გაჯიმაგომედოვი ასევე იხსენებს ლიფტში შეხვედრას, სადაც, მისი თქმით, დვალიშვილი დაცვის უკან იდგა: "მე მას ვუთხარი, რომ ჩვენ ჯერ არ დაგვისრულებია".
რუსი მებრძოლი ამტკიცებს, რომ საქართველოში სიტუაციის ესკალაცია განზრახ აირიდა, რათა ეროვნებებს შორის კონფლიქტი არ გამოეწვია, თუმცა ახლა, როცა მერაბისგან გმირს ქმნიან, იძულებულია საკუთარი პოზიცია დააფიქსიროს.
აბუ-დაბის ინციდენტთან დაკავშირებით გაჯიმაგომედოვმა განაცხადა:
პრესკონფერენციის დღიდან ვეძებდი შესაძლებლობას, პასუხი მომეთხოვა, მაგრამ ჩემმა ძმებმა დამასწრეს და გააკეთეს ის, რასაც ნებისმიერი კაცი ოჯახის შეურაცხყოფისთვის გააკეთებდა
მისივე სიტყვებით, "ჩვენი წინაპრები ამის გამო სხვებს თავებს აჭრიდნენ, მას კი მხოლოდ რამდენჯერმე წამოარტყეს".
