რაფა მირს სექსუალური ძალადობისთვის 8.5 წლით თავისუფლების აღკვეთა მიესაჯა.
ელჩეს 28 წლის თავდამსხმელს, რაფა მირს სექსუალური ძალადობის გამო 8.5 წლით პატიმრობა მიესაჯა. აღნიშნული გადაწყვეტილება ვალენსიის სასამართლომ მიიღო.
სასამართლომ საქმეზე მეორე ბრალდებულსაც, რომელიც ასევე ფეხბურთელია, სექსუალური ძალადობისთვის 2.5 წლით თავისუფლების აღკვეთა და ჯარიმა მიუსაჯა.
განაჩენი ითვალისწინებს კომპენსაციის გადახდას: პირველი ბრალდებულის მსხვერპლის სასარგებლოდ 64 000 ევროს (საიდანაც 14 000 ევრო ჯანმრთელობისთვის მიყენებული ზიანის ანაზღაურებაა, ხოლო 50 000 ევრო – მორალური ზიანი), ხოლო მეორე დაზარალებულისთვის – 6 280 ევროს.
გარდა ამისა, განაჩენით ძალაში შედის 10-წლიანი შემაკავებელი ორდერი, რომლის მიხედვითაც მირს ეკრძალება დაზარალებულთან 500 მეტრზე უფრო ახლოს მიახლოება.
აღნიშნული განაჩენი ექვემდებარება გასაჩივრებას.
შეგახსენებთ, რომ ფორვარდი 2024 წლის სექტემბრის დასაწყისში დააკავეს ორი ქალის – 21 წლის ანდრეასა და 25 წლის კარლას მიმართ განხორციელებული სექსუალური ძალადობის ეჭვით. ერთ-ერთი მათგანის ჩვენების თანახმად, დანაშაული ფეხბურთელის სახლში, კერძო წვეულებაზე მოხდა, სადაც გოგონები მირთან ღამის კლუბში გაცნობის შემდეგ წავიდნენ.
