ცნობილია, ვინ იმსაჯებს უკრაინა-საქართველოს გადამწყვეტ მატჩში

უეფას ერთა ლიგის დასკვნით, მეექვსე ტურში საქართველოს ეროვნული ნაკრები უკიდურესად პრინციპულ შეხვედრას ჩაატარებს და სტუმრად უკრაინას დაუპირისპირდება.

ორივე გუნდი ბოლო პერიოდში საკმაოდ არასტაბილურ ფორმაშია, უკრაინამ ზედიზედ 3 შეხვედრა დათმო, ხოლო საქართველოს ნაკრებსაც სერიოზული პრობლემები აქვს (ოფიციალურ მატჩებში უკვე ზუსტად ერთი წელია გოლი არ გაუტანია). მიუხედავად ამისა, მომავალ დაპირისპირებას უდიდესი სატურნირო მნიშვნელობა აქვს.

მატჩში B ლიგის მეორე ჯგუფის მესამე ადგილის ბედი წყდება. ამ პოზიციის დაკავება გუნდს B დივიზიონში ადგილს პირდაპირ, ყოველგვარი პლეი-ოფის გარეშე შეუნარჩუნებს. გარდა ამისა, მესამეადგილოსანს დიდი შანსი აქვს, ევრო 2028-ის შესარჩევ ეტაპზე 5-გუნდიან ჯგუფში მოხვდეს (რაც ბევრად სჯობს 4-გუნდიანს) და მარტში ამხანაგური მატჩებისთვისაც გამოუთავისუფლდეს სივრცე. სატურნირო ცხრილიდან გამომდინარე, ამ მიზნის მისაღწევად საქართველოს მხოლოდ გამარჯვება სჭირდება, მაშინ როცა უკრაინელებს ფრეც ხელს აძლევთ.

უკვე ცნობილია იმ მსაჯთა ბრიგადის ვინაობაც, რომელიც დასკვნით შეხვედრას მოემსახურება. უეფამ მთავარ არბიტრად სლოვენიელი მარტინ მატოშა დანიშნა. მას ლაინსმენებად თანამემამულეები, მატეი ჟუნიჩი და ალეკსანდარ კასაპოვიჩი დაეხმარებიან, მეოთხე მსაჯის ფუნქციას დავიდ შმაიჩი შეასრულებს, ხოლო VAR-ის ოთახში ალენ ბოროშაკი და ასმირ საგრკოვიჩი იმუშავებენ.

ისტორიული სტატისტიკა, სამწუხაროდ, ჩვენს სასარგებლოდ ნამდვილად არ მეტყველებს. აქამდე გამართულ ურთიერთშეხვედრებში საქართველოს უკრაინა არასდროს დაუმარცხებია - ჯამში 5 ფრე და 7 წაგება ფიქსირდება. შეძლებს თუ არა ჩვენი გუნდი ამ უსიამოვნო ტრადიციის დარღვევას და სასურველი შედეგის მიღწევას, 17 ნოემბერს, სლოვაკეთის ქალაქ კოშიცეში გაირკვევა.