უელსის ეროვნულ ნაკრებს მატჩების წინ ასიმეტრიული და უცნაური გუნდური ფოტოების გადაღების განსაკუთრებული ტრადიცია აქვს. ეს რიტუალი კიდევ ერთხელ შეახსენეს გულშემატკივრებს განას ნაკრებთან გამართული ამხანაგური შეხვედრის წინ (რომელიც კარდიფში 1-1 დასრულდა).
საინტერესოა, რომ ამ ტრადიციას როგორც მამაკაცთა, ისე ქალთა ეროვნული გუნდიც აქტიურად მიჰყვება.
ეს ქაოსური ფოტოები ვირუსული პირველად ევრო 2016-ის დროს გახდა, როდესაც გარეთ ბეილისა და აარონ რემზის უელსმა საფრანგეთში ნახევარფინალამდე მიაღწია. ტრადიციის წარმოშობის შესახებ ფეხბურთელები ასეთ განმარტებებს აკეთებენ:
ყოფილი ფეხბურთელი ჯო ლედლი იხსენებს, რომ თავიდან გუნდს უბრალოდ კარგად არ გამოსდიოდა სწორ ხაზზე დგომა და ფოტოების გადაღება. როდესაც რამდენიმე ასეთი „წარუმატებელი“ ფოტო დაგროვდა და გუნდმა პარალელურად წარმატებას მიაღწია, მოთამაშეებმა ჩათვალეს, რომ ამ ფორმატს მათთვის იღბალი მოჰქონდა და სწორი ფოტოს გადაღებაზე უარი თქვეს.
კიდევ ერთი ყოფილი მოთამაშე, ჯონი უილიამსი ადასტურებს, რომ დროთა განმავლობაში ეს ყველაფერი ერთგვარ ხუმრობად და გართობად იქცა, სადაც მოთამაშეები სპეციალურად ცდილობენ რაც შეიძლება უცნაური პოზიციები შეარჩიონ.
სამწუხაროდ, 2026 წლის მსოფლიო ჩემპიონატზე უელსის ამ სახალისო ფოტოებს ვეღარ ვიხილავთ. კრეიგ ბელამის გაწვრთნილი გუნდი მუნდიალის მიღმა დარჩა, რადგან საკვალიფიკაციო ეტაპის პლეი-ოფში ბოსნია-ჰერცეგოვინასთან პენალტების სერიაში დამარცხდა. უელსელები ახლა სექტემბერში დასაწყები უეფას ერთა ლიგისთვის ემზადებიან.
