უეფაში არ დაუჭირეს მხარი წესს, რომელიც პირზე ხელის აფარების გამო ფეხბურთელების გაძევებას ითვალისწინებს.
როგორც ცნობილია, 2026 წლის მსოფლიო ჩემპიონატზე კონფლიქტების დროს პირზე ხელის აფარებისთვის ფეხბურთელებს მოედნიდან გააძევებენ. თუმცა, ფეხბურთის ასოციაციების საერთაშორისო საბჭომ (IFAB) ეს წესი ყველა ტურნირისთვის სავალდებულო არ გახადა.
The Guardian-ის ინფორმაციით, ოთხშაბათს სტამბოლში უეფა-ს აღმასრულებელი კომიტეტის ამ სეზონის ბოლო სხდომა გაიმართება და წესების ცვლილებები დღის წესრიგში შეტანილი არ არის. საკლუბო შეჯიბრებების კომიტეტი მომავალ კვირას დაამტკიცებს მომავალი სეზონის მამაკაცთა და ქალთა ტურნირების ჩატარების წესებს, სადაც არსებითი ცვლილებები მოსალოდნელი არ არის.
ამგვარად, უეფას ეგიდით გამართულ ტურნირებზე პირზე ხელის აფარების გამო ფეხბურთელებს ჯერჯერობით არ გააძევებენ.
ორგანიზაციის წყაროებმა აღნიშნეს, რომ მათი მსაჯთა კომიტეტი დააკვირდება, თუ რა როლს ითამაშებს ახალი წესები მსოფლიო ჩემპიონატზე. მომავალში უეფა-მ შესაძლოა იმსჯელოს ამ წესების საკუთარ ტურნირებში შემოღებაზე.
შეგახსენებთ, რომ მანამდე ბენფიკას შემტევი, ჯანლუკა პრესტიანი ჩემპიონთა ლიგის მატჩის დროს, ვინისიუსის მისამართით გაჟღერებული „ჰომოფობიური შეურაცხყოფის“ გამო 6 მატჩით (აქედან 3 პირობითი) დასაჯეს. კონფლიქტის დროს პრესტიანის პირი მაისურით ჰქონდა დაფარული, რის გამოც ვერ მოხერხდა იმის დამტკიცება, ზუსტად რა თქვა პრესტიანიმ. ვინისიუსი ამტკიცებდა, რომ არგენტინელმა რასისტული შეურაცხყოფა მოაყენა.
