რეალი რაშფორდის ხელში ჩაგდებას გეგმავს

მანჩესტერ იუნაიტედს მიმდინარე ზაფხულს მარკუს რაშფორდის სარფიანად გაყიდვის კარგი შანსი ეძლევა.

28 წლის ინგლისელმა თავდამსხმელმა ეს სეზონი იჯარით ბარსელონაში გაატარა, სადაც ჰანსი ფლიკის გუნდში 48 მატჩში 14 გოლითა და 14 ასისტით გამოიჩინა თავი. კატალონიურ კლუბს მისი გამოსყიდვის უფლება აქვს, თუმცა ტრანსფერის ირგვლივ გარკვეული ფინანსური უთანხმოება შეიქმნა.

ბარსელონა ცდილობს, რომ მანჩესტერ იუნაიტედის მიერ დაწესებული 30 მილიონი შეამციროს ან გარიგება შეცვალოს. კატალონიელების მთავარი სურვილია, ფეხბურთელი კიდევ ერთი სეზონით იჯარით დაიტოვონ და გადახდა მომავლისთვის გადაავადონ.

მანჩესტერ იუნაიტედის პოზიცია კი მკაფიოა: ისინი ფასის დაკლებას არ აპირებენ. კლუბში მიიჩნევენ, რომ რაშფორდს ოლდ ტრაფორდზე მომავალი არ აქვს, ჩემპიონთა ლიგაზე გასვლის გამო მისი ხელფასი ავტომატურად იზრდება, ამიტომ ინგლისელებს მისი სასწრაფოდ გასხვისება სურთ და ბარსელონას ეუბნებიან - „ან გადაიხადეთ, ან სხვა მყიდველს ვნახავთ“.

სწორედ ამ დროს საქმეში ჟოზე მოურინიო ერთვება, რომელიც ბენფიკას დატოვების შემდეგ, ამ ზაფხულს მადრიდის რეალს ჩაიბარებს და სანტიაგო ბერნაბეუზე მეორე ვოიაჟს დაიწყებს.

გავრცელებული ინფორმაციით, პორტუგალიელ სპეციალისტს ძალიან სურს რაშფორდის თავის ახალ გუნდში ხილვა და ის მადრიდელთა ერთ-ერთი პირველი სატრანსფერო სამიზნე იქნება.

თუ ბარსელონასთან მოლაპარაკებები კიდევ უფრო გაიწელება, რეალი მზადაა ტრანსფერი ჩაშალოს, ფასი სრულად გადაიხადოს და თავდამსხმელი დედაქალაქში წაიყვანოს, რაც მანჩესტერ იუნაიტედისთვის იდეალური სცენარია.