დღეს პრემიერ ლიგაში უმნიშვნელოვანესი მატჩების დღეა - სატურნირო ცხრილის როგორც ზედა, ისე ქვედა ნაწილში შესაძლოა ყველაფერი საბოლოოდ გადაწყდეს.
ბორნმუთისა და მანჩესტერ სიტის დაპირისპირება, ისევე როგორც ლონდონური დერბი ჩელსისა და ტოტენჰემს შორის, უდიდესი წნეხისა და ემოციების ფონზე ჩაივლის.
მანჩესტერ სიტის ბანაკში უცნაური განწყობაა, რასაც საფუძვლად უდევს ინფორმაცია იმის შესახებ, რომ პეპ გვარდიოლა სეზონის ბოლოს გუნდის დატოვებას აპირებს. ესპანელი სპეციალისტი ეტიჰადზე 2016 წლიდან მუშაობს, თუმცა იზრდება განცდა, რომ ინგლისურ ფეხბურთში მისი ეპოქა სრულდება.
დიდი ეპოქის დასასრული - პეპი მიდის, მისი შემცვლელი გარკვეულია
დღეს მანჩესტერ სიტის მარტივი მოცემულობა აქვს: ბორნმუთთან ნებისმიერი სხვა შედეგი, გარდა მოგებისა, მათ საჩემპიონო იმედებს წერტილს დაუსვამს და არსენალს ოფიციალურად გააჩემპიონებს.
ბორნმუთს საკუთარი მოტივაცია აქვს - ანდონი ირაოლას ხელმძღვანელობით გუნდი ისტორიაში პირველად ჩემპიონთა ლიგის საგზურის მოპოვებას ცდილობს და ეს ირაოლას ბოლო საშინაო მატჩია.
არსენალის ფანები კი 2003/04 წლების უძლეველი სეზონის შემდეგ პირველ საჩემპიონო ტიტულთან სულ რაღაც ერთი ნაბიჯით არიან დაშორებულნი.
ცხრილის ფსკერზე ტოტენჰემმა ბოლო ოთხი მატჩის წაუგებლად ჩატარებით ოდნავ ამოისუნთქა, თუმცა პრემიერ ლიგაში ადგილი ჯერ კიდევ არ აქვთ განაღდებული.
კლუბი ამ საღამოს მე-18 ადგილზე მყოფ ვესტ ჰემს 2 ქულით უსწრებს. ჩელსისთან მოგება მათ მათემატიკურად გარანტირებულ გადარჩენას მოუტანს ბოლო ტურის წინ. ფრეც კი მათთვის შესანიშნავი იქნებოდა, რადგან ტოტენჰემს ბევრად უკეთესი ბურთების შეფარდება აქვს, ვიდრე ვესტ ჰემს.
მთელი წნეხი ახლა ვესტ ჰემზე გადადის, რომელიც კონკურენტის შეცდომას ელოდება.
