უკრაინა კვლავ დაუძლეველ ბარიერად რჩება

ერთა ლიგის მე-2 ტურში საქართველოს ნაკრები დინამო არენაზე გამართულ მატჩში უკრაინას დაუზავდა (0:0).

აღნიშნული შეხვედრა რამაზ სვანაძისთვის პირველი აღმოჩნდა საქართველოს ეროვნული ნაკრების სრულუფლებიანი მწვრთნელის რანგში.

ქართველმა სპეციალისტმა აქცენტი პრესინგზე და პირველ ნომრად თამაშზე გააკეთა, რაც საქართველოს კარგადაც გამოსდიოდა და მეტოქეს თამაშით აღემატებოდა კიდეც, თუმცა სათამაშო უპირატესობა გოლად ვერცერთხელ ვერ აქცია, მიუხედავად არაერთი კარგი მომენტისა.

საბოლოოდ, უკრაინამ, რომელიც აღნიშნულ მატჩზე შედარებით გადახალისებული შემადგენლობით გავიდა, საკუთარ მიზანს მიაღწია - კარი მშრალად შეინახა და შინ ერთი ქულით ბრუნდება, რაც ჯგუფში ლიდერობის საშუალებას მინიმუმ ტურის ბოლომდე აძლევს.

საქართველოსთვის კი საშინაო მატჩები ამ სანაკრებო პაუზაზე დასრულებულია - მომდევნო ორ შეხვედრას რამაზ სვანაძის გუნდი უნგრეთთან (2 ოქტომბერს) და ჩრდილოეთ ირლანდიასთან (5 ოქტომბერს) გამართავს.

ორი ტურის შემდეგ საქართველოს ეროვნულ გუნდს მხოლოდ 1 ქულა აქვს.