სასამართლომ პრემიერ ყოფილ არბიტრს, დევიდ კუტს, სასჯელი გამოუტანა.
შეგახსენებთ, პრემიერ ლიგის ყოფილ მსაჯს ბრალი ედებოდა იმაში, რომ 2020 წლის 2 იანვარს მან შექმნა A კატეგორიის უხამსი ვიდეო ბავშვის მონაწილეობით. ეს ყველაზე მძიმე კატეგორიაა, რომელიც, როგორც წესი, მოიცავს მცირეწლოვანთა გაუპატიურების ან ზრდასრულთა მხრიდან სექსუალური ძალადობის ამსახველ მასალას. პოლიციის ინფორმაციით, აღნიშნული ვიდეო 2025 წლის თებერვალში აღმოაჩინეს.
ოქტომბერში ყოფილმა მსაჯმა ნოტინგემის სამეფო სასამართლოში დანაშაული აღიარა, რის შემდეგაც ის გირაოთი გაათავისუფლეს.
დღეს ცნობილი გახდა, რომ კუტს 9 თვიანი პირობითი თავისუფლების აღკვეთა მიესაჯა ორწლიანი გამოსაცდელი ვადით. ასევე მას დაეკისრა სექსუალური დანაშაულების პრევენციის სპეციალური განკარგულება 10 წლის ვადით (ასეთი ზომა სასამართლოს მიერ ინიშნება იმ პირებისთვის, რომლებიც სექსუალური თვალსაზრისით საფრთხეს წარმოადგენენ როგორც საზოგადოებისთვის, ისე კონკრეტული პირებისთვის).
შეგახსენებთ, ადრე კუტი სამუშაოდან ჩამოშორდა ლივერპულისა და იურგენ კლოპის შესახებ გამოთქმული სიტყვების გამო — ინტერნეტში გავრცელდა ვიდეო, სადაც ის კერძო საუბარში გერმანელ მწვრთნელს „აბსოლუტურ ნაბი*ვარს“ უწოდებს.
მოგვიანებით გავრცელდა კიდევ ერთი ჩანაწერი, რომელშიც კუტი ევრო 2024-ის პერიოდში თეთრ ფხვნილს ისუნთქავს. ასევე ვრცელდებოდა ინფორმაცია, რომ ის ცდილობდა ნარკოტიკებთან დაკავშირებული წვეულების ორგანიზებას ტოტენჰემი – მანჩესტერ სიტის მატჩის შემდეგ. თავად კუტი კოკაინზე დამოკიდებულებასაც აღიარებდა.
2024 წლის დეკემბერში დევიდ კუტი PGMOL-დან გაათავისუფლეს — ორგანიზაციიდან, რომელიც ინგლისში მსაჯობაზეა პასუხისმგებელი.
